بەژداری پێ کردنی هەواڵ لە

FacebookTwitterGoogle BookmarksRSS Feed

هه‌ڵمه‌تی گۆڕینی‌ دیمۆگرافی له‌ناوچه‌ سوننه‌نشینه‌كان ده‌ستیپێكردووه‌ ‌
Featured

19 حوزەیران 2017
وته‌یه‌كی پێویست
ده‌هله‌كی چه‌ند بابه‌تێكی وروژاند كه‌ قسه‌كانی له‌گه‌ڵ سیاسه‌ت‌و میتۆدی كورد‌و یه‌كێتی‌و ته‌نانه‌ت سیاسه‌تی میدیایی كوردستانی نوێشدا نایه‌ته‌وه‌، به‌ڵام له‌سۆنگه‌ی بڕوابوونمان به‌ ئازادیی راده‌ربڕین‌و له‌و رووه‌شه‌وه‌ كه‌ هه‌ندێك له‌و لێدوان‌و وه‌ڵامانه‌ ده‌بنه‌ مایه‌ی مشتومڕ‌و گه‌نگه‌شه‌، وه‌ك خۆی ده‌قی دیداره‌كه‌ بڵاوده‌كه‌ینه‌وه‌:
 
له‌چوارچێوه‌ی‌ زنجیره‌ چاوپێكه‌وتنێكی كوردستانی نوێ‌ له‌گه‌ڵ ژماره‌یه‌ك لێپرسراو و ئه‌ندام په‌رله‌مانی عیراق له‌به‌غدا، دیدارێكی تایبه‌تی له‌گه‌ڵ ره‌عد ده‌هله‌كی  په‌رله‌مانتاری سوننه‌ له‌لیستی یه‌كێتی‌ هێز‌و، سه‌رۆكی لیژنه‌ی‌ كۆچ و كۆچبه‌رانی عیراق سازدا‌و تێیدا روونیكرده‌وه‌ كه‌ گۆڕانی دیموگرافی له‌ ناوچه‌ سوننه‌نشینه‌كان ده‌ستپێكردووه‌‌و ده‌ڵێت ره‌نگه‌ هه‌ندێك له‌ژێر گوشاردا ببنه‌ شیعه‌و گوشارێكی زۆر له‌سه‌ر ناوچه‌كانی سوننه‌ هه‌یه‌، ئێمه‌ش چه‌ند پرسیارێكمان له‌باره‌ی‌ ئاینده‌ی‌ ناوچه‌كانیان‌و په‌یوه‌ندیی نێوان هه‌رێم و به‌غدا لێكرد.
كوردستانی نوێ- به‌غدا
 
*له‌باره‌ی چاره‌نووسی ناوچه‌ سوننه‌ نشینه‌كانه‌وه‌، دوای‌ نه‌مانی داعش هه‌ندێك پێیانوایه‌ ره‌نگه‌ ئه‌و ناوچانه‌ تا 50 ساڵی دیكه‌ش هه‌ر له‌ژێر هه‌ژموونی شیعه‌دا بمێننه‌وه‌، یان ئاخۆ له‌ژێر هه‌ژموونی توركیادا له‌ناوچه‌كه‌ به‌ته‌واوی ده‌بڕێته‌وه‌؟  یان له‌وانه‌یه‌ هه‌ڵمه‌تێكی فراوان بۆ به‌شیعه‌كردنیش ده‌ستپێبكات؟
-نه‌ك ته‌نها له‌ موسڵ، بگره‌ له‌دوای نه‌مانی داعش له‌ موسڵ و هه‌موو ناوچه‌كانی دیكه‌، گۆڕانێكی گه‌وره‌ی‌ پێكهاته‌یی‌ دانیشتوان (دیمۆگرافیا) له‌ ناوچه‌كانی سوننه‌ نشین رووده‌دات و ده‌ستیپێكردووه‌.
*كه‌واته‌ تۆش هاوڕایت كه‌ ئه‌مه‌ رووده‌دات؟
-ئێستا وا رووده‌دات، به‌ڵگه‌ش ئه‌وه‌یه‌ كه‌ حكومه‌ت نیه‌تی جددی و راسته‌قینه‌ی‌ نییه‌ بۆ گێڕانه‌وه‌ی‌ لێقه‌وماوان‌و ئاواره‌ی شاره‌ سوننه‌كان كه‌ ئێستا ناوچه‌كانیان ئازادبووه‌! ئه‌مه‌ به‌ڵگه‌ی‌ روون و حاشاهه‌ڵنه‌گره‌، پێكهاته‌ی‌ سوننه‌ بۆ قۆناغی دوای‌ داعش ترس و دڵه‌ڕاوكێیه‌كی زۆری هه‌یه‌، به‌تایبه‌ت چه‌ك له‌گۆڕیدایه‌و كۆنترۆڵی نه‌كراوه‌و لای گروپی جیاوازی چه‌كداره‌، ئه‌مه‌ش نامه‌یه‌كی روونه‌ كه‌ داهاتووی ناوچه‌ سوننییه‌كان له‌سه‌رخۆو ئارام نابێت.
ئێمه‌ به‌هیواین گۆڕانكارییه‌كانی گۆڕه‌پانی نێوده‌وڵه‌تی كاربكاته‌ سه‌ر بارودۆخی عیراق و ببێته‌ هۆی دروستبوونی دامه‌زراوه‌ی ده‌وڵه‌تیی‌و دیموكراسییه‌كان، كه‌ ئێستا له‌ئارادا نین، ئێستا دامه‌زراوه‌ی‌ ده‌وڵه‌تیی له‌ عیراق نییه‌، به‌ڵكو حكومه‌ت هه‌یه‌، حكومڕانێتی ده‌سه‌ڵات، بۆماوه‌ی‌ چوار ساڵ حوكم ده‌كات و ته‌واو، له‌گه‌ڵ هه‌ڵبژاردنێك ده‌سه‌ڵاتێكی دیكه‌ دێته‌ سه‌ر حوكم.
*ئه‌ی‌ راسته‌ ده‌ڵێن سه‌رۆك هۆزه‌كانی سوننه‌ چۆن به‌یعه‌ت و په‌یمانیان به‌ داعش دا، ئێستا په‌یمان و به‌یعه‌ت به‌ شیعه‌ ده‌ده‌ن؟
-بێگومان كاتێك پێكهاته‌ی‌ سوننه‌ له‌چه‌ك داده‌ماڵرێت و له‌لایه‌ن داعشه‌وه‌ چه‌قۆ ده‌خرێته‌ سه‌ر گه‌ردنی، ناچاره‌ بۆ پاراستنی خۆی و خێزانی و هۆزه‌كه‌ی‌ ئه‌م كاره‌بكات، ته‌نانه‌ت ئه‌وه‌ی‌ له‌ میدیاكانیش ده‌ركه‌وت چه‌كیان بۆ داعش هه‌ڵگرتبوو ئه‌مه‌ش هه‌ر له‌ناچارییدا بوو، ئێستاش كه‌ ده‌بینین چه‌ك له‌ژێر كۆنترۆڵدا نییه‌و سوننه‌ش له‌چه‌ك داماڵراوه‌، ناچار كارێك بكات بۆ پاراستنی خۆی، ئێمه‌ هه‌رده‌م قسه‌ له‌سه‌ر ئه‌وه‌ ده‌كه‌ین كه‌ چه‌ك له‌ده‌ست ده‌وڵه‌تدا بێت، به‌ڵام كاتێك چه‌ك له‌ده‌ست ده‌وڵه‌تدا نه‌بوو، یان نه‌ما، ئه‌وا پێموایه‌ داهاتووی عیراق نائارام و پڕ له‌ پشێویی ده‌بێت و سه‌قامگیریی نابێت.
مه‌زه‌هه‌بی سوننه‌و شیعه‌ دوو مه‌زهه‌بی ئیسلامن، ده‌شێت له‌هه‌موو كاتێكدا بگۆڕدرێت، ئینجا به‌هێز یان له‌ڕێی‌ ئیمتیازو پاره‌و ده‌ستكه‌وته‌وه‌، به‌ڵام هاووڵاتیان ده‌ست به‌ مه‌زهه‌بی خۆیانه‌وه‌ ده‌گرن. بیرمان نه‌چێت له‌سه‌رده‌می سه‌دامدا كاتێك گوشاری زۆر له‌سه‌ر شیعه‌ هه‌بوو، ژماره‌یه‌كی زۆر له‌ شیعه‌ به‌ره‌و سوننه‌ هاتن‌و بوونه‌ سوننه‌، به‌ڵام ئه‌مه‌ هه‌ڵه‌یه‌، دوای نه‌مانی سه‌دام گه‌ڕانه‌وه‌ سه‌ر مه‌زهه‌بی خۆیان.
*پێتوایه‌ دوای‌ داعش سوننه‌ داوای‌ جیاكردنه‌وه‌ی‌ ناوچه‌كانیان بكه‌ن و داوای فیدرالیی بكه‌ن؟
-به‌رله‌ هه‌مووشتێك، دروستكردنی هه‌رێم مافێكی ده‌ستورییه‌، له‌ ده‌ستووردا به‌ڕوونی ئاماژه‌ی‌ پێدراوه‌، ئه‌گه‌ر خواستێكی له‌و جۆره‌ هه‌بێت، ئه‌وا بێگومان به‌هۆی ناعه‌داله‌تیی و هه‌ست نه‌كردنه‌ به‌ یه‌كسانیی یان وه‌كیه‌كی، كاتێك ده‌بینین له‌ كوردستان ده‌نگێكی به‌رز هه‌یه‌ بۆ جیابوونه‌وه‌ له‌عیراق و داوای‌ سه‌ربه‌خۆیی ده‌كرێت، ئه‌وا به‌هۆی ئه‌و سته‌مه‌ بووه‌ كه‌ له‌سه‌ر هاووڵاتیان هه‌بووه‌، بۆیه‌ كاتێك سته‌م و جه‌ورت له‌سه‌ر ده‌بێت و گوشاری زۆرت بۆ دێنێت، به‌دڵنیاییه‌وه‌ به‌دوای‌ چاره‌سه‌رو به‌دیلدا ده‌گه‌ڕێت، له‌ چوارچێوه‌ی‌ ده‌ستوورو قانوندا، یان به‌دوای‌ چاره‌سه‌رێكدا ده‌گه‌ڕێیت به‌به‌رگی قانونییه‌وه‌.
*كه‌واته‌ له‌ناو سوننه‌دا ئاراسته‌یه‌ك هه‌یه‌ به‌ره‌و فیدرالیی؟
-ئه‌گه‌ر ئه‌و سته‌م و زوڵمه‌ی‌ له‌سه‌ر سوننه‌ هه‌یه‌ به‌رده‌وام بێت، ئه‌وا هه‌موو ئه‌گه‌رێك له‌به‌رده‌م سوننه‌دا هه‌یه‌و كراوه‌یه‌.
*پێتوایه‌ سوننه‌ رووی خۆیان له‌ توركیا وه‌رگێڕن به‌هۆی لاوازبوونی رۆڵی ئه‌و وڵاته‌و روو له‌لایه‌كی دیكه‌ بكه‌ن، بۆ نموونه‌ ئه‌مریكا یان هه‌ر وڵاتێكی دیكه‌ی‌ ناوچه‌كه‌و ئه‌وروپا؟
-قه‌ناعه‌تێك له‌لای توێژی سیاسییه‌كانی سوننه‌ دروستبووه‌ كه‌ ده‌بێ‌ راستگۆبن له‌گه‌ڵ هاووڵاتیان، هه‌موومان ئه‌و راستییه‌ ده‌زانین كه‌ ئه‌مریكا چاودێرو سه‌رپه‌رشتیاری پرۆسه‌ی‌ سیاسییه‌ له‌دوای‌ 2003، ده‌بێ‌ ئێمه‌ راستییه‌كه‌ بڵێین قسه‌ی‌ زیاده‌و موزایه‌ده‌كردن سوودی نییه‌، ئه‌وه‌ی‌ گرنگه‌و پێویسته‌ ئه‌وه‌یه‌ كه‌ هیچ گرفتێك له‌ رێككه‌وتن و تێگه‌یشتن نییه‌ له‌پێناو پاراستنی به‌رژه‌وه‌ندیی گشتی‌، بنیاتنانی ده‌وڵه‌ت، بۆ نموونه‌ بنكه‌یه‌كی سه‌ربازی ئه‌مریكا له‌قه‌ته‌ر هه‌یه‌، له‌كاتێكدا قه‌ته‌ر ده‌وڵه‌ته‌و دامه‌زراوه‌ی هه‌یه‌، ژیانیشیان خۆشه‌، ئه‌مریكا له‌وێ بوونی هه‌یه‌، له‌شوێنی‌ دیكه‌ش هه‌یه‌. بۆیه‌ بوونی ئه‌مریكا له‌ عیراق له‌ چوارچێوه‌ی‌ به‌رژه‌وه‌ندیی، به‌ڵام به‌مه‌رجێك سه‌روه‌ریی عیراق و كه‌رامه‌تی عیراقییه‌كان پارێزراوبێت. ئه‌گه‌ر ده‌ستوه‌ردان هه‌بووبێت له‌لایه‌ن ئێران یان توركیا یان هه‌ر وڵاتێكی دیكه‌وه‌، ئه‌وه‌ لاوازیی لێپرسراو یان سه‌ركردایه‌تی سیاسیی حكومه‌ته‌، ناڕێكوپێكی لایه‌نه‌كانه‌ كه‌ ده‌سه‌ڵاتدارن، كاتێك ئاواره‌و لێقه‌وماوان دوای‌ دوو ساڵ له‌ رزگاربوونی ناوچه‌كانیان رێگایان نادرێت بگه‌ڕێنه‌وه‌، ئه‌وا نوێنه‌رانیان له‌هه‌موو ده‌رگایه‌ك ده‌ده‌ن و مامه‌ڵه‌ له‌گه‌ڵ هه‌موو لایه‌نێك ده‌كه‌ن له‌پێناو پاراستنی‌ خاك و هاووڵاتیانیان.
*له‌دوای‌ داعش، زه‌مینه‌ ره‌خساو ده‌بێت بۆ سه‌ربه‌خۆبوونی كوردستان؟ یان بارودۆخ رێده‌دات كوردستان له‌عیراق جیاببێته‌وه‌؟
-هه‌ر بڕیارێك كه‌ ده‌درێت، بێگومان ئاوێته‌ی‌ كۆمه‌ڵێك به‌رژه‌وه‌ندیی ناوخۆو ده‌وروبه‌ره‌، هاوكات له‌ژێر كاریگه‌ریی‌ و فاكته‌ری‌ جیاوازدایه‌، ئه‌گه‌ر هه‌رێمی كوردستان هه‌ستبكات هه‌رێمیكه‌ له‌عیراق و هه‌موو ماف و به‌ركه‌وته‌كانی هه‌یه‌و له‌چوارچێوه‌ی‌ عیراقدا ئارامیی و خۆشگوزه‌رانیی هه‌بێت، بێگومان په‌یوه‌ندییه‌كانی له‌گه‌ڵ ناوه‌نددا به‌هێز ده‌كات، به‌ڵام كاتێك مافه‌كانی زه‌وت بكرێت و بودجه‌و مووچه‌ی‌ ببڕدرێت، بێگومان بیر له‌چاره‌سه‌ری دیكه‌ ده‌كاته‌وه‌.
*كه‌واته‌ تۆ پێتوایه‌ به‌غدا سته‌می له‌ كوردستان كردبێت؟
-بێگومان، نابێت ململانێی‌ سیاسی ره‌نگدانه‌وه‌ی‌ له‌سه‌ر هاووڵاتیان هه‌بێت، هه‌رێم جگه‌ له‌وه‌ی‌ مووچه‌ی‌ بڕاوه‌، ئه‌وه‌ی‌ ده‌ستی ده‌كه‌وێت دووبه‌شی بۆ په‌نابه‌رو ئاواره‌ی‌ ناوچه‌كانی ژێر ده‌ستی‌ داعشه‌، به‌شێكیش بۆ خۆیه‌تی و بۆ ژیانییه‌تی‌، مووچه‌ی‌ فه‌رمانبه‌ران بڕاوه‌، به‌هۆی ململانێی‌ سیاسی، له‌كاتێكدا ململانێ شتێكه‌و مووچه‌ی‌ فه‌رمانبه‌ران شتێكی دیكه‌یه‌. پێویسته‌ ململانێی‌ سیاسی تێكه‌ڵ به‌ ژیانی هاووڵاتییان نه‌كرێت، جا له‌ هه‌ولێر یان سلێمانی یان له‌ به‌غدا یان له‌ به‌سره‌ بێت.
*كه‌واته‌ بۆچی ئێوه‌ پشتیوانی له‌ جیابوونه‌وه‌ی‌ كوردستان‌و هه‌ڵدانی ئاڵا له‌سه‌ر دامه‌زراوه‌ ره‌سمییه‌كانی كه‌ركوك ناكه‌ن، لانیكه‌م به‌شێكی عیراق له‌ده‌ست ئه‌و سته‌مه‌ رزگاری بێت؟
-كه‌ركوك شتێكه‌و كوردستان شتێكی دیكه‌یه‌.
*كه‌واته‌ ئێوه‌ پشتیوانیی له‌ كورد ده‌كه‌ن به‌بێ‌ كه‌ركوك؟
-من له‌ چوارچێوه‌ی‌ ده‌ستوور قسه‌ ده‌كه‌م، له‌ ده‌ستووردا ناوی كه‌ركوك نه‌هاتووه‌ وه‌ك هه‌رێمی كوردستان، ناوی نه‌هاتووه‌ وه‌ك شارێكی عه‌ره‌بی، له‌ ده‌ستووردا وه‌ك حاڵه‌تێكی تایبه‌ت هاتووه‌و شارێكی عیراقییه‌، پێویسته‌ هه‌موو دانیشن بۆ رێككه‌وتن له‌سه‌ر پێدانی تایبه‌تمه‌ندیی به‌ كه‌ركوك.
*له‌ده‌ستووردا هاتووه‌ كه‌ ناوچه‌یه‌كه‌ جێی ناكۆكییه‌، كه‌واته‌ ده‌شێت یه‌كلایی ببێته‌وه‌ بۆ كوردستان، بۆ ده‌ڵێیت كوردستانی نییه‌؟
-به‌ڵێ‌ له‌ ده‌ستوردا هاتووه‌ جێی‌ ناكۆكییه‌، بۆیه‌ پێویسته‌ خه‌ڵكی شاره‌كه‌ بڕیاربده‌ن و مافی ئه‌وه‌ بدرێت كه‌ مافخوراوه‌و مافی هه‌یه‌.
*كه‌ ماوه‌ی‌ ده‌ستوریی مادده‌ی‌ 140 ته‌واوبوو بۆ كارتان نه‌كرد رێوشوێنێكی دیكه‌ له‌ په‌رله‌مان ببیننه‌وه‌و ئه‌م پرسه‌ یه‌كلایی بكه‌نه‌وه‌؟
-خۆت ده‌زانی ئێمه‌ی‌ سوننه‌ ئیداره‌ی‌ وڵاتمان نه‌كردووه‌، كه‌چی ئه‌وه‌ی‌ سزا ده‌درێت له‌ ناوچه‌ جێناكۆكه‌كان، سوننه‌كانن، كه‌وایه‌ پێویسته‌ له‌سه‌رمان زه‌مینه‌یه‌كی ئارام بۆ ئه‌و ناوچانه‌ بسازێنین بۆ پێكه‌وه‌ ژیانێكی ئاشتیانه‌ی‌ گروپ و نه‌ته‌وه‌و پێكهاته‌كانی ناوچه‌كان، نابێ‌ تیگه‌یشتن و چاره‌سه‌رێكی دیاریكراو له‌لایه‌ن لایه‌نێكه‌وه‌ به‌سه‌ر لایه‌نێكی دیكه‌دا بسه‌پێنرێت. ئه‌مڕۆ چاره‌سه‌ر لای سوننه‌ نییه‌، ئه‌مڕۆ سوننه‌ ده‌رگایان كردۆته‌وه‌ بۆ گفتوگۆو دانیشتن له‌پێناو پێكه‌وه‌ ژیانێكی ئاشتیانه‌، ئه‌مڕۆ ئه‌گه‌ر چاره‌سه‌رێك بسه‌پێنرێت، ئه‌وا سبه‌ی‌ رۆژێ بارودۆخ بگۆڕێت، بێگومان چاره‌سه‌ری‌ دیكه‌ ده‌سه‌پێنرێت، هه‌روه‌ك چۆن پێشتر چاره‌سه‌ر له‌لایه‌ن یه‌ك لایه‌نه‌وه‌ به‌سه‌ر نه‌ته‌وه‌كاندا سه‌پێنراو دواتر گۆڕانی نوێ‌ هات و چاره‌سه‌ری‌ دیكه‌ خرایه‌ڕوو، پێویسته‌ چاره‌سه‌ره‌كان بۆ هه‌موو عیراق و هه‌موو ناوچه‌یه‌كی بێت نه‌ك چاره‌سه‌رێك بێت له‌پێناو ده‌ستكه‌وتی سیاسی.
*پێشمه‌رگه‌ ئه‌و ناوچانه‌ی‌ رزگاركرد كه‌ كوردستانیی بوون، پێتوانییه‌ ئیدی واقیعێكی نوێ‌ هاتۆته‌پێش و كوردستان سنووری به‌ته‌واوی یه‌كلایی كرده‌وه‌؟
-پێش هه‌موو شتێك پیرۆزبایی له‌ پێشمه‌رگه‌ ده‌كه‌م به‌ ده‌ركردنی تیرۆرستان، ئه‌وه‌ی‌ كردیان بۆ هه‌موو عیراق بوو به‌ هاوكاریی و هه‌ماهه‌نگیكردن له‌گه‌ڵ هه‌موو هێزه‌كانی عیراق به‌ سوپاو پۆلیسه‌وه‌، سڵاو ره‌حه‌تیش بۆ شه‌هیدانی پێشمه‌رگه‌و سوپاو هێزه‌ عیراقییه‌كان.
سه‌باره‌ت به‌رزگاركردنی ناوچه‌كان كه‌ تۆ باسی ده‌كه‌یت، كه‌واته‌ تۆ باسی سه‌پاندنی هێز ده‌كه‌یت، بیرت نه‌چێت له‌ڕابردوودا سه‌دام هێزی ده‌سه‌پاند، به‌ڵام ئه‌وه‌ چاره‌سه‌ربوو؟ ئه‌وه‌ ئه‌نجامی هه‌بوو؟ كه‌وایه‌ پێویسته‌ له‌ خۆسه‌پاندن به‌هێز دووركه‌وینه‌وه‌، سه‌پاندنی هێز دوو رۆژه‌، رۆژێك بۆتۆیه‌ و رۆژێك له‌دژو له‌سه‌ر تۆیه‌، كه‌واته‌ پێویسته‌ به‌دوای‌ چاره‌سه‌رێكی دیكه‌دا بگه‌ڕێین كه‌ بنه‌ماكه‌ی‌ چۆنییه‌تی پێكه‌وه‌ ژیانی ئاشتیانه‌بێت، دروستكردنی ژینگه‌یه‌ك بێت هه‌موو ئاشتیانه‌ به‌یه‌كه‌وه‌ بژین، به‌ڕاستی‌ عیراق خوێنی زۆری له‌به‌ر رۆیشتووه‌، كه‌واته‌ كاتی ئه‌وه‌ هاتووه‌ بۆ پێكه‌وه‌ ژیانێكی ئارام بگه‌ڕێین. ئه‌گه‌ر ئه‌مڕۆ هێزی پێشمه‌رگه‌ ئه‌و ناوچانه‌ی‌ كۆنترۆڵكردووه‌، كه‌واته‌ ده‌بێ‌ به‌دوای‌ چاره‌سه‌رێكی گونجاودا بگه‌ڕێین، چونكه‌ ئه‌گه‌ر ئه‌مڕۆ ئه‌وان هێز ده‌سه‌پێنن، ئه‌وا سبه‌ی‌ ئه‌گه‌ر بارودۆخ گۆڕا، ئه‌وا هێزت به‌سه‌ردا ده‌سه‌پێنرێت، عیراق له‌ بارودۆخێكی هه‌ستیاردایه‌و ئه‌و ناوچانه‌ش زۆر هه‌ستیارن، ئه‌وه‌ی‌ هێزی هه‌یه‌ پێویسته‌ به‌ حیكمه‌ت مامه‌ڵه‌ له‌گه‌ڵ دۆخه‌كه‌دا بكات.

 

پەیوەندی

بۆ پەیوەندی کردن بە بەرێوەبەرایەتی تۆڕی هەواڵی هەولێر ئەو ئیمێل و ژمارە مۆبایلانەی خوارەوە بەکاربێنە

  • ناونیشنا : عێراق - هەولێر - بەرامبەر نەخۆشخانەی سەنتەری دڵ

  • ئیمێل : عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

  • ماڵپەر :٠٠٩٦٤٧٥٠٤٥٤٧٩٣٧

    ماڵپەر : ٠٠٩٦٤٧٥٠٤٦٦١٧٤٥