هه‌ڵۆ پێنجوێنی: ئه‌ركی‌ كورد ئه‌وه‌ نییه‌ كێشه‌ی‌ ناوخۆیی دروست بكات ‌
گرنگ

28 ئازار 2017
هه‌ڵۆ پێنجوێنی‌ ئه‌ندامی‌ سه‌ركردایه‌تیی‌ ی‌.ن.ك له‌ گفتوگۆیه‌كی‌ تایبه‌تی‌ به‌رنامه‌ی‌ فۆكه‌سی ده‌نگی‌ گه‌لی‌ كوردستاندا، سه‌باره‌ت به‌ پرس‌و ئه‌گه‌ری‌ شه‌ڕی‌ كورد به‌ كوردو مه‌ترسییه‌كانی‌، سه‌رنجی‌ خۆی‌ خسته‌ڕوو و رایگه‌یاند: گره‌نتی‌ بۆ كورد ته‌نها كورد خۆیه‌تی‌.
 
كورد به‌ره‌و سه‌ركه‌وتنێكی‌ گه‌وره‌ ده‌ڕوات
له‌ وه‌ڵامی‌ پرسیارێكدا كه‌ سه‌ره‌ڕای‌ قه‌یرانه‌ سیاسی‌و داراییه‌كانی‌ هه‌رێم، ئه‌گه‌ره‌كانی‌ روودانی‌ شه‌ڕی‌ ناوخۆیی چی مانایه‌كی‌ هه‌یه‌؟، هه‌ڵۆ پێنجوێنی‌ وتی‌: كورد به‌ره‌و سه‌ركه‌وتنێكی‌ گه‌وره‌ ده‌ڕوات، كه‌ ئه‌وه‌ش سه‌ركه‌وتنه‌ به‌سه‌ر تیرۆریستانی‌ داعشدا، كه‌ له‌ راستیدا ئه‌وه‌ شه‌ڕێك نییه‌ به‌ ته‌نها كورد بۆی‌ چووبێته‌ مه‌یدان، یان ته‌نیا هێزه‌ ناوچه‌ییه‌كان چووبێتنه‌ مه‌یدان، به‌ڵكو ئه‌گه‌ر به‌ شێوازێكی‌ دیكه‌ سه‌یری‌ بكه‌ین، شه‌ڕێكی‌ جیهانییه‌، به‌ڵام له‌ ناوچه‌یه‌كدا ئه‌گوزه‌رێت كه‌ به‌شداربووانی‌، ئه‌وانه‌ی‌ له‌ به‌ره‌ی‌ تیرۆریستانن، ته‌نها خه‌ڵكی‌ شارێك یان وڵاتێك نین، به‌ڵكو له‌ ته‌واوی‌ وڵاتانه‌وه‌، له‌ دوورو نزیكه‌وه‌ كۆبوونه‌ته‌وه‌ و شه‌ڕ ئه‌كه‌ن‌و شه‌ڕه‌كه‌ش ته‌نها له‌ یه‌ك وڵات نییه‌، دیاره‌ كه‌ له‌ چه‌ند وڵاتێكه‌، به‌هه‌مان شێوه‌ش ئه‌وانه‌ی‌ له‌ به‌رامبه‌ر تیرۆریستان وه‌ستاون، هێزه‌ هاوپه‌یمانه‌كانن، له‌ ئه‌مریكاو ئه‌وروپاو وڵاتانی‌ دوورو نزیك، هه‌روه‌ها هێزه‌كانی‌ ناوچه‌كه‌ به‌ تایبه‌تی‌ كورد رۆڵێكی‌ گرنگی‌ هه‌یه‌ له‌ شه‌ڕه‌كه‌دا، كورد به‌ هه‌موو پێكهاته‌و هێزه‌كانییه‌وه‌، له‌ باشووری‌ كوردستان‌و رۆژئاڤاو ئه‌وانه‌ی‌ به‌شه‌كانی‌ تری‌ كوردستانیش بێگومان پشتیوان‌و هاوكار بوون به‌ خوێن‌و به‌ توانای‌ خۆیان، هه‌موو ئه‌مانه‌ له‌ سه‌نگه‌ری‌ ئه‌م شه‌ڕه‌دان.
سه‌باره‌ت به‌ قۆناغی‌ ئێستای‌ شه‌ڕی‌ دژی‌ داعشیش، هه‌ڵۆ پێنجوێنی‌ ئاماژه‌ی‌ بۆ ئه‌وه‌كرد كه‌ «ئه‌م شه‌ڕه‌ ئێستا به‌ره‌و كۆتایی ده‌چێت، ئێستا دۆخه‌كه‌ گۆڕاوه‌و جیاوازه‌ له‌ پێشتر، له‌و قۆناغه‌ی‌ كه‌ داعش په‌لاماری‌ ده‌داو پانتاییه‌كانی‌ خۆی‌ فراوان ده‌كرد، دواجار وه‌ستێنراو به‌ره‌و شكستی‌ زیاتر پاشه‌كشێی پێكرا، ئێستا ده‌بینین شه‌ڕه‌كه‌ چڕبۆته‌وه‌، له‌و دوو شاره‌دا، كه‌ هه‌ردووكیان به‌ پایته‌ختی‌ داعش داده‌نرێن، كه‌ «موسڵ‌و ره‌قه‌»ن، شه‌ڕه‌كه‌ش به‌ شكستی‌ داعش به‌ره‌و كۆتایی ئه‌چێت».
 
بنه‌ماكانی‌ یاسای‌ جه‌نگ
سه‌باره‌ت به‌ پشك‌و ده‌ستكه‌وته‌كانی‌ كورد وه‌ك به‌شێك له‌ براوه‌ی‌ ئه‌م جه‌نگه‌ هه‌ڵۆ پێنجوێنی‌ وتی‌» یاسای‌ جه‌نگ هه‌میشه‌ هه‌ر وابووه‌، براوه‌كانی‌ جه‌نگ گفتوگۆ ده‌كه‌ن، له‌كاتی‌ شه‌ڕو پێش شه‌ڕو پاش شه‌ڕ، سه‌ره‌نجام رێكه‌وتن ئه‌كرێت، هه‌ریه‌ك له‌ براوه‌كان پشكی‌ سه‌ركه‌وتنی‌ شه‌ڕی‌ به‌رده‌كه‌وێت، ئه‌مه‌ له‌ مێژووی‌ كورددا یه‌كه‌مجاره‌ كورد به‌شداریی به‌ره‌یه‌كی‌ شه‌ڕ بكات كه‌ پشتیوانیی نێوده‌وڵه‌تی‌ هه‌بێت‌و لایه‌نێكی‌ كاریگه‌ر بێت‌و براوه‌ش بێت، هه‌روه‌ها ئه‌م شه‌ڕه‌ ته‌نها له‌ پارچه‌یه‌كی‌ كوردستانیش نه‌بێت، له‌ دوو پارچه‌ی‌ كوردستان بێت، كه‌ دوو پێگه‌ی‌ ستراتیژین، كه‌ باشوورو رۆژئاڤای‌ كوردستانن.
پێویسته‌ له‌م كاته‌دا كورد یه‌كڕیزو یه‌كگرتوو بێت بۆ ئه‌وه‌ی‌ بتوانێت له‌ پشكی‌ براوه‌ی‌ شه‌ڕ باشترین پشكی‌ به‌ركه‌وێت، هه‌روه‌ها ئه‌و ده‌ستكه‌وتانه‌ی‌ به‌ده‌ستیشی هێناون زیادیان بكات.
ئه‌وه‌شی روونكرده‌وه‌ كه‌ «له‌م شه‌ڕه‌دا كورد سه‌ره‌ڕای‌ هه‌موو ئه‌و كاره‌سات‌و ماڵ وێرانی‌‌و نه‌هامه‌تیانه‌ی‌ به‌سه‌ریهاتووه‌، وه‌ك كاره‌ساتی‌ كۆمه‌ڵكوژیی شنگال‌و ئه‌وه‌ی‌ له‌ كۆبانێ بینیمان، ئه‌و شاره‌ شه‌ڵاڵی‌ خوێن كراو به‌ چ قاره‌مانێتییه‌ك رزگاركرا، زۆری‌ تری‌ وه‌ك سه‌رێكانی‌‌و جه‌له‌ولاو كه‌ركوك‌و ده‌شتی‌ نه‌ینه‌واو ئه‌وانه‌ی‌ كه‌ به‌ هه‌زاران شه‌هیدیان له‌ پێناودا درا، سه‌ره‌ڕای‌ هه‌موو ئه‌وانه‌، ده‌ستكه‌وتی‌ گه‌وره‌ به‌ده‌ستهاتوون.
 
به‌ یه‌كبوون ده‌ستكه‌وتی‌ گه‌وره‌ به‌ده‌ستده‌هێنین
هه‌ڵۆ پێنجوێنی‌ وتیشی‌: «ئێستا ئه‌ركی‌ كورد ئه‌وه‌ نییه‌ كێشه‌ی‌ ناوخۆیی دروست بكات، چونكه‌ ده‌زانین كه‌ له‌ رابردوودا هه‌ر كاتێك یه‌كبووین، ده‌ستكه‌وتی‌ گه‌وره‌مان هه‌بووه‌، هه‌ر كاتێكیش ناته‌با بووبین، به‌تایبه‌تی‌ كه‌ ناته‌باییه‌كه‌ گه‌یشتبێته‌ ئاستی‌ شه‌ڕ، ده‌ستكه‌وته‌كانمان له‌ ده‌ستداوه‌»، راشیگه‌یاند: بێگومان گره‌نتی‌ بۆ كورد ته‌نها كورد خۆیه‌تی‌، چونكه‌ ته‌نها خۆی‌ ده‌توانێ ئه‌و گره‌نتیه‌ بۆ خۆی‌ دروستبكات، ئه‌ویش به‌وه‌ی‌ كه‌ خۆمان له‌گه‌ڵ قۆناغه‌كه‌دا بگونجێنین‌و ریزه‌كانی‌ خۆمان یه‌ك بخه‌ین».
 
یه‌كێتی‌و دروشمی‌ مافی‌ چاره‌ی‌ خۆنووسین
هه‌ڵۆ پێنجوێنی‌ جه‌ختی‌ له‌وه‌كرده‌وه‌ كه‌ «یه‌كێتی  هه‌ر له‌سه‌ره‌تای‌ دامه‌زراندنییه‌وه‌ مێژوویه‌كی‌ له‌ تێكۆشان‌و خه‌بات هه‌یه‌ بۆ سه‌ربه‌خۆیی، له‌و باره‌یه‌وه‌ ئاماژه‌ی‌ بۆ دروشمی‌ مافی‌ چاره‌ی‌ خۆنووسین كرد كه‌ كارو خه‌باتی‌ زۆری‌ بۆ كردووه‌، وتیشی: یه‌كێك له‌ گۆڕانكارییه‌ گه‌وره‌كانی‌ شۆڕشی نوێ ئه‌وه‌بوو دروشمی‌ خه‌باتی‌ سیاسیی كوردی‌ له‌ حوكمی‌ زاتییه‌وه‌ گۆڕی‌ بۆ به‌دیهێنانی‌ مافی‌ چاره‌ی‌ خۆنووسین بۆ گه‌لی‌ كوردستان، ی.ن.ك هه‌ر له‌سه‌ره‌تای‌ دامه‌زراندنییه‌وه‌ كاری‌ بۆ ئه‌و ئامانجه‌ كردووه‌و به‌كرداریش پشتیوانیی هه‌موو پارچه‌كانی‌ كوردستانی‌ كردووه‌ له‌ شۆڕش‌و خه‌باتدا، به‌تایبه‌تیش سه‌رۆك مام جه‌لال بۆ خۆی‌ هه‌میشه‌ پشت‌و په‌نای‌ پارچه‌كانی‌ دیكه‌و لایه‌نه‌ سیاسییه‌كانیان بووه‌، هه‌روه‌ك روونه‌ ی.ن.ك خوێنی‌ له‌ پێناوی‌ ئه‌و ئامانجه‌دا به‌خشیوه‌و هه‌زاران شه‌هیدیشی پێشكه‌ش به‌ به‌دیهاتنی‌ ئه‌و ئامانجه‌ به‌رزانه‌ی‌ خۆی‌ كردووه‌، سیستمی‌ فیدراڵی‌ له‌ كوردستان چه‌سپێنرا».
له‌ درێژه‌ی‌ قسه‌كانیدا ئه‌و ئه‌ندامه‌ی‌ سه‌ركردایه‌تی‌ یه‌كێتی ئاماژه‌ی‌ بۆ هه‌موو ده‌ستپێشخه‌ریی‌و داهێنانه‌كانی‌ یه‌كێتی كرد له‌وانه‌ « له‌ ساڵی‌ 1992 كۆلێژی‌ سه‌ربازیی له‌ قه‌ڵاچواڵان دامه‌زراندو هه‌ر ئه‌وكات زانكۆی‌ سلێمانی‌ دامه‌زرانده‌وه‌، دواتر له‌ ساڵی‌ 1997 یه‌كێتی هه‌نگاوێكی‌ مێژوویی گرنگی‌ سه‌ربه‌خۆی‌ ئابووری‌ ناو مه‌سه‌له‌ی‌ نه‌وتی‌ هێنایه‌ پێش‌و بۆیه‌كه‌م جار نه‌وتی‌ له‌ شیواشۆك به‌رهه‌مهێنا، جگه‌ له‌وه‌ی‌ له‌سه‌ر ده‌ستی‌ یه‌كێتی په‌یوه‌ندییه‌كانی‌ هه‌رێمی‌ كوردستان له‌گه‌ڵ ده‌ره‌وه‌ فراوان كراو په‌ره‌ی‌ پێدرا، له‌و بواره‌شدا سه‌رۆك مام جه‌لال رۆڵی‌ بنچینه‌یی بینی، ئه‌وه‌ بۆیه‌كه‌مجار بوو له‌ مێژووی‌ شۆڕشی كورد دا هێزێكی‌ كوردی‌ په‌یوه‌ندیی‌ له‌گه‌ڵ دراوسێكانی‌ له‌سه‌ر بنه‌مای‌ دراوسێیه‌تی‌‌و به‌رژه‌وه‌ندیی‌ هاوبه‌ش بێت، نه‌ك له‌سه‌ر بنه‌مای‌ پاشكۆیه‌تی‌».
 
پرسی سه‌ربه‌خۆیی
هه‌ڵۆ پێنجوێنی‌ وتیشی: یه‌كێتیی بۆچوونی‌ وایه‌ مه‌سه‌له‌ی‌ هه‌نگاونان بۆ ده‌وڵه‌ت‌و سه‌ربه‌خۆیی به‌وه‌ ده‌بێت كه‌ به‌شی هه‌ره‌زۆری‌ كێشه‌كانی‌ ناوخۆ چاره‌سه‌ر بكرێن، هه‌روه‌ها وڵاتانی‌ دراوسێش به‌تایبه‌تی‌ توركیاو ئێران دان به‌ مافه‌كانی‌ كورددا بنێن‌و رێزی‌ دراوسێیه‌تی‌ له‌ هه‌رێمی‌ كوردستان بگرن، ئه‌وه‌شی خسته‌ڕوو كه‌ «یه‌كێتی له‌پێش هه‌موو هێزێكه‌وه‌ خواستی‌ ده‌وڵه‌ت‌و سه‌ربه‌خۆیی هه‌یه‌، به‌ڵام ده‌وڵه‌تێك كه‌ خاوه‌ندارێتی‌ یه‌ك به‌ یه‌كی‌ هاونیشتمانیان بكات‌و خاوه‌ن ئیراده‌ بێت، نه‌ك ده‌وڵه‌تێكی‌ ده‌سته‌مۆو ژێرده‌سته‌»
 
نه‌خشه‌ڕێگه‌كه‌ی‌ یه‌كێتی
له‌باره‌ی‌ نه‌خشه‌ڕێگه‌كه‌ی‌ یه‌كێتییه‌وه‌ هه‌ڵۆ پێنجوێنی‌ وتی‌: ئێمه‌ وه‌ك یه‌كێتی‌، نه‌خشه‌ڕێگه‌كه‌مان بۆ به‌گه‌ڕخستن‌و گه‌رموگوڕتركردنی‌ گفتوگۆكانه‌ له‌نێوان لایه‌نه‌ ناكۆكه‌كاندا، هه‌روه‌ها زه‌مینه‌ خۆشكردنه‌ بۆ گفتوگۆو لێتێگه‌یشتنی‌ پارتی‌‌و گۆڕان‌و رێكخستنه‌وه‌ی‌ په‌یوه‌ندییه‌كانمان له‌گه‌ڵ به‌غدا، پاشان له‌گه‌ڵ دراوسێكانمان، جگه‌ له‌وه‌ش بۆ چۆنێتی‌ مامه‌ڵه‌كردنه‌ له‌گه‌ڵ ره‌وشی رۆژئاڤای‌ كوردستان».
له‌كۆتایی دیدارەکەشدا جه‌ختی‌ له‌ دیدوتێڕوانینی‌ یه‌كێتیی كرده‌وه‌ بۆ پێویستیی ده‌ستپێكردنه‌وه‌ی‌ گفتوگۆی‌ نێوان هه‌موو لایه‌نه‌ سیاسییه‌كان.

 

پەیوەندی

بۆ پەیوەندی کردن بە بەرێوەبەرایەتی تۆڕی هەواڵی هەولێر ئەو ئیمێل و ژمارە مۆبایلانەی خوارەوە بەکاربێنە

  • ناونیشنا : عێراق - هەولێر - بەرامبەر نەخۆشخانەی سەنتەری دڵ

  • ئیمێل : عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

  • ماڵپەر :٠٠٩٦٤٧٥٠٤٥٤٧٩٣٧

    ماڵپەر : ٠٠٩٦٤٧٥٠٤٦٦١٧٤٥