بەپێی زانیارییەكان دوور لەچاوی میدیاكان بەرپرسانی كۆمەڵ‌و بزووتنەوەی گۆڕان كۆبوونەتەوە، كۆمەڵ ئامادەیی خۆیان بۆ پێكهێنانی یەك لیستی هاوبەش لەگەڵ گۆڕان‌و كاندیدێكی هاوبەش بۆ پۆستی سەرۆكی هەرێمی كوردستان نیشانداوە.

هەر بەپێی زانیارییەكان، كە هەفتەنامەی رووداو ئەمڕۆ دوو شەممە بڵاویكردووەتەوە كۆبوونەوەكە رۆژی 14/6/2017 ئەنجامدراوەو كۆمەڵ پێشنیازەكەی بۆ گۆڕان كردووە، بەڵام سەركردەكانی گۆڕان پڕۆژەكەیان رەتكردووەتەوەو رایانگەیاندووە "دەمانەوێت‌ قەبارەی خۆمان لەدوای كۆچی كاك نەوشیروان مستەفا بزانین".

زانا رووستایی، پەرلەمانتاری عێراق لەفراكسیۆنی كۆمەڵی ئیسلامی رایگەیاند "بەئاسایی دەبینم كۆمەڵ‌و گۆڕان زیاتر لێك نزیكببنەوە، پێشبینیش دەكەم لیستێكی نیشتمانی بۆ هەڵبژاردنەكان دروستبكەن".

لەپاڵ نزیكی بۆچوونەكانی لە گۆڕان، كۆمەڵی ئیسلامی لەگەڵ هەریەك لەیەكگرتووی ئیسلامی‌و بزووتنەوەی ئیسلامی كاری هاوبەشی ئیسلامی هەیە، ئەگەرچی كۆمەڵ بەفەرمی دەستهەڵگرتنی لەپرۆژەی هاوكاریی ئیسلامی رانەگەیاندووە، بەڵام ئاراستەكە بەرەو ئەوە دەڕوات كۆمەڵ بەجیا بەشداری هەڵبژاردن بكات. 

زانیارییەكان باس لەوە دەكەن زۆرینەی مەڵبەندەكانی كۆمەڵ لیستی هاوبەشی ئیسلامی رەتدەكەنەوەو پێیانوایە لەبەرژەوەندی ئەواندا نییەو رەنجی دوو ساڵی گوتاری توندیان بەرامبەر پارتی دیموكرات بەفیڕۆ دەدات.

(رووداو) زانیویەتی 39 رێكخراوی ئیسلامی، كە 3 نوێنەریان لەدەستەی باڵای كاری هاوبەشی ئیسلامی هەیە، داوایان لەهەرسێ‌ لایەنەكە (یەكگرتوو، كۆمەڵ و بزووتنەوە) كردووە لەماوەیەكی دیاریكراودا تێڕوانین‌و قسەو بڕیاری خۆیان سەبارەت بەدروستكردنی بەرەی ئیسلامی بخەنەڕوو، بۆ ئەوەی بزانرێت كێ‌ لەگەڵ دروستكردنی لیستی ئیسلامییەو كێش لەگەڵی نییە.

هەفتەی رابردوو سەڵاحەدین بەهائەدین ئەمینداری یەكگرتووی ئیسلامی لەكاتی بەسەركردنەوەی رێكخستنی حیزبەكەی لەپارێزگای هەڵەبجە، دروستكردنی لیستی ئیسلامییەكانی بەناوی "چاكسازیی نیشتمانی" ئاشكراكردو رایگەیاند "ئەگەر لایەنێك‌و كەسانێكیش دڵسارد بن، یان لەگەڵمان بەردەوامنەبن‌و نەیەن، ئەوا ئێمە بەردەوامدەبین‌و لیستەكە ناكەینە قوربانی هیچ كەسێك".

سەركردەیەكی یەكگرتووی ئیسلامی، كە نەیویست ناوی بڵاوبكرێتەوە، رایگەیاندووە "ئێمەو برایانی بزووتنەوە وەڵامی ئیجابی رێكخراوە ئیسلامییەكانمان داوەتەوە بۆ دروستكردنی لیستی ئیسلامی‌و چاوەڕێی برایانی كۆمەڵ دەكەین، پێمان خۆشە هەموومان پێكەوە بین، بەڵام رێزیش لەبڕیاری ئەوان دەگرین".

هاوكات زانا رووستایی لەبارەی لیستی هاوبەشی ئیسلامییەكان رایگەیاندووە "كۆمەڵ كورسییەكانی زیادبكات كەمناكات، ئەگەر بەلیستێك لەگەڵ گۆڕان‌و لایەنەكانی دیكە بەشداریی هەڵبژاردن بكات، دەنگدەری ئیسلامی جێگیرە، ئەگەر ئیسلامییەكان بەیەك لیستیش بەشداری هەڵبژاردن بكەن ژمارەی كورسییەكانیان لەوەی ئێستا هەیە زیادناكات".

هەر لەوبارەوە كامیل مەحموود، وتەبێژی بزووتنەوەی ئیسلامی رایگەیاند "بزووتنەوەی ئیسلامی لەزمانی جەنابی رابەری گشتییەوە وەڵامی رێكخراوە ئیسلامییەكانمان داوەتەوە، كە ئامادەی هەموو كارێكی هاوبەشین، هەر لەیەك لیستییەوە تا دروستكردنی یەك حیزب‌و یەكگرتنی سەرجەم ئیسلامییەكان".

كۆمەڵ.. دەنگی لەهەولێرو بڕیاری لەسلێمانی
كۆمەڵ دوو لەسەر سێی كورسییەكانی لەدوایین هەڵبژاردنی پەرلەمانی عێراقدا لەهەولێر بوو، 23 هەزار دەنگی لەكۆمەڵەكانی سلێمانی زیاتر بوو، بەڵام گوتاری شەقامی سلێمانی‌و نزیكبوونەوەی لەگۆڕان بەسەر هەڵوێستەكانی ئەو حیزبەوە لەدوای دانیشتنی 23ی حوزەیرانی 2015 دیارە. 

زانا رووستایی پێیوایە، ئەو سیاسەتەی كۆمەڵ پشتیوانی‌و متمانەی جەماوەری بۆ حیزبەكەی زیاتر كردووە.

راپرسی رێگای كۆمەڵ‌و گۆڕان جیادەكاتەوە
سەرەڕای نزیكی‌و هاوهەڵوێستیی گۆڕان‌و كۆمەڵ لەپرسە سیاسییەكان، بەتایبەتی لەمەسەلەی بایكۆتكردنی كۆبوونەوەكانی مەسعود بارزانی، بەڵام لەپرسی راپرسیدا كۆمەڵ رێگای خۆی لەگۆڕان جیاكردووەتەوە، بەتایبەت سەركردە هەولێرییەكانی كۆمەڵ داوایان كردووە حیزبەكەیان لەبڕیار وەرگرتن پەلە نەكات، بۆیە لەكۆبوونەوەی رۆژی 10/6/2017 ی ئەنجوومەنی سیاسی بەسەرپەرشتی عەلی باپیر ئەمیری كۆمەڵ، كە لەهەولێر بەڕێوەچوو، هیچ بڕیارێك نەدرا.

عەلی حوسێن، ئەندامی سەركردایەتی پارتی لەو بارەوە رایگەیاندووە "ئێمە چاوەڕێی زیاترمان لەبرایانی كۆمەڵی ئیسلامی دەكرد، ئەو كێشانەی لەرابردووش روویاندا بەهۆی ئەدای خراپی سەرۆكایەتی پەرلەمان بوو، بەڵام ئێستا هەموومان لەبەردەم پرسێكی نیشتمانی‌و نەتەوەییداین، كە ئەویش راپرسییە، بۆیە چاوەڕێی ئاساییبوونەوەی زیاتری پەیوەندییەكان دەكەین".

عەلی حوسێن هەروەها رایگەیاند "خیتابی كۆمەڵ‌و گۆڕان لەسەر راپرسی جیاوازە، ئومێدمانە ئەو راپرسییە ببێتە دەرفەتێكی باشتر بۆ چارەسەركردنی كێشەكان".

بەپێی ئامارێکی وەزارەتی گەنجینەی ئەمریکا قەتەر لەماوەی ٥ ساڵدا بەبڕی ٦٤ ملیار دۆلار ھاوکاری گروپە تیرۆریستییەکانی کردووە.
وەزارەتی گەنجینەی ئەمریکا ئاشکرایکردووە، لەماوەی نێوان ساڵانی ٢٠١٠ بۆ ٢٠١٥ بنەماڵەی میری قەتەر بەبڕی ٦٤ ملیار دۆلاریان وەک ھاوکاری پێشکەش بە گروپە تیرۆریستی و رێکخراوە توندرەوەکانی کردووە، قەتەریش رەتیدەکاتەوە ھاوکاری گروپە تیرۆریستییەکانی کردبێت.
لەلایەکی ترەوە رۆژنامەی جەزیرەی سعودی ئاشکرایکردووە.
"عەبدوڵا بن خالد" وەزیری ناوخۆی قەتەر لەساڵی ٢٠١٣ سنورەکانی وڵاتەکەی بۆ ژمارەیەک لە تیرۆریستەکانی ئەفغانستان کردۆتەوە تۆمەتباریشیکردووە بەوەی کەماڵەکەی بۆتە جێگەی خۆحەشاردانی تیرۆریستان .
رۆژنامە سعودییەکە ئاشکرایکردووە ئەندامێکی خێزانی میری قەتەر تۆمەتبارە بەھاوکاریکردنی گروپە تیرۆریسیتییەکان و یەک ملیۆن دۆلار و خانویەک و پاسپۆرتێکی داوە بە ئەبو موسعەب زەرقاوی سەرکردەی پێشووی گروپی تیرۆریستی قاعیدە لەعێراق کاتێک لە ساڵی ٢٠٠٢ ئەفغانستانەوە ھاتۆتە عێراق.

 

وەزارەتی دەرەوەی روسیا رەخنە لەھەنگاوەکانی ئەم دواییەی ئیدارەی ئەمریکا بەرامبەر بەکوبا دەگرێت و پاڵپشتی خۆشی بۆ ھاڤانا دوپات دەکاتەوە
وەزارەتی دەرەوەی روسیا لەراگەیەندراوێکدا نیگەرانی خۆی دەربڕیوە لەبارەی ھەڵوەشاندنەوەی ئەو رێکەوتنەی کە لەسەردەمی دەسەڵاتی باراک ئۆبامادا بۆ ئاسایی کردنەوەی پەیوەندیەکانی ئەمریکاو کوبادا ئیمزاکراوە و رایگەیاندووە ھەڵسوکەوتی ئێستای ئەمریکا بەرامبەر بە کوبا ھاوشێوەی جەنگی ساردە.
ئاماژەی بەوەکردووە ھەڵوەشاندنەوەی رێککەوتنی نێوان ئەمریکا و کوبا بۆ ئاسایی بوونەوەی پەیوەندییەکانیان ئەوە دەردەخات کە لەماوەی نیو سەدەی رابردوودا ھیچ گۆرانکارییەک لەسیاسەتی ئەمریکا بەرامبەر بە کوبا رووی نەداوە
رۆژی شەممە دۆناڵد ترامپ سەرۆکی ئەمریکا رایگەیاند،قەدەغەی سەر گەشتکردنی ھاوڵاتیانی ئەمریکا بۆ کوبا و سزاکانی سەر ئەو وڵاتە جارێکی تر کاریان پی دەکرێتەوە،  سەرەرای ئەوەش باڵیۆزخانەی ئەمریکا لە ھاڤانا داناخرێت و بەشێک لە پەیوەندیە بازرگانیەکان و گەشتە ئاسمانیەکانی نێوان ھەردوو وڵاتیش بەردەوام دەبێت.

شانه‌ی‌ راگه‌یاندنی‌ جه‌نگی‌ سه‌ر به‌ سوپای‌ عێراق رایگه‌یاند، 500 هه‌زار بڵاوكراوه‌ به‌سه‌ر موسڵدا به‌ردراوه‌ته‌وه‌ بۆ ئاگاداربوونی‌ هاوڵاتیان له‌ پێشڕه‌وی‌ هێزه‌ چه‌كداره‌كان.

شانه‌كه‌ له‌به‌یاننامه‌یه‌كدا ئاماژه‌ی‌ به‌وه‌كردووه‌، بڵاوكراوه‌كان له‌لایه‌ن هێزی‌ ئاسمانییه‌وه‌ به‌ردراونه‌ته‌وه‌ كه‌ پێكهاتبوون له‌ 500 هه‌زار بڵاوكراوه‌ی‌ تایبه‌ت.

رونیشیكردووه‌ته‌وه‌، بڵاوكراوه‌كان زانیارییان تێدا بووه‌ له‌باره‌ی‌ پێشڕه‌وی‌ هێزه‌ عێراقییه‌كان له‌موسڵ و هێرشكردنه‌ سه‌ر ئه‌و شوێنانه‌ی‌ تائێستا له‌ژێر ده‌ستی‌ داعش ماونه‌ته‌وه‌، له‌گه‌ڵ پێدانی‌ رێنمایی تایبه‌ت پێیان.

هێزه‌ عێراقییه‌كان دوێنێ ده‌ستپێكردنی‌ هێرشیان بۆ كۆنتڕۆڵكردنه‌وه‌ی‌ موسڵی‌ كۆن له‌به‌شی‌ راستی‌ موسڵ ده‌ستپێكرد، كه‌ دوایین پێگه‌ی‌ داعشه‌ له‌ شاره‌كه‌.

رۆژی‌ 17ی‌ تشرینی دووەمی‌ 2016 هێزەكانی‌ پێشمەرگە و سوپای‌ عێراق و بەپشتیوانی هێرشی ئاسمانی هاوپەیمانی نێودەوڵەتی دژ بەداعش بەڕابەرایەتی ویلایەتە یەكگرتووەكانی ئەمەریكا قۆناغی‌ یەكەمی‌ ئۆپەراسیۆنی كۆنترۆڵكردنەوەی موسڵ-یان دەستپێكرد.

دوای تێپەڕبوونی 100 رۆژ بەسەر دەستپێكردنی ئۆپەراسیۆنەكەدا، تەواوی خۆرهەڵاتی موسڵ لەچەكدارانی داعش پاككرایەوە.

19ی شوباتی ئەمساڵ، قۆناغی دووەمی ئۆپەراسیۆنی رزگاركردنی موسڵ دەستیپێكرد، هێزەكانی پۆلیسی فیدراڵی و یەكەكانی بژاردەی وەزارەتی ناوخۆ بەرەوپێشچوونی بەرچاویان لەبەشی‌ راستی‌ موسڵ بەدەستهێناوە.

بەگوێرەی ئامارەكانی نەتەوەیەكگرتووەكان، لەئۆپەراسیۆنی موسڵدا هەشت هەزار، هاوڵاتی مەدەنی كوژراون و برینداربوون، ئەو ژمارەیەش تەنها ئەو كەسانە دەگرێتەوە كە رەوانەی نەخۆشخانەكان كراون.

هەرچەندە عێراق تائێستا هیچ ئامارێكی شەڕی موسڵ-ی بڵاونەكردووەتەوە، بەڵام مانگی ئاداری ئەمساڵ، ژەنەڕاڵێكی ئەمەریكی رایگەیاند تا ئەوكات 774 سەربازی عیراقی كوژراون وچوار هەزار و 600 ی تریش برینداربوون.

لە هێرشێكدا بۆسەر موسڵمانانی لەندەن، ژمارەیەك قوربانی لێكەوتەوە.
پۆلیسی بەریتانیا رایگەیاند، دوای تەواو بوونی نوێژی تەراویح بەكاتی لەندەن و لەكاتی چونەدەرەوەی ژمارەیەك موسڵمان لە مزگەوتی فینسبری پارك لە باكوری شاری لەندەنی پایتەخت ئۆتۆمبێلێك خۆی كردووە بە ناویاندا و بەهۆیەوە كەسێك كوژراوە و 8 كەسی دیكەش برینداربوون.
ئاماژەی بۆ ئەوەشكردوە، هێرشەكە لەلایەن سێ‌ كەسەوە ئەنجامدراوە كە راستڕەون و یەكێكیان دەستگیركراوە، هەڵمەتێكیش بۆ دەستگیركردنی ئەنجامدەران و تێوەگلاوانی تری روداوەكە دەستیپێكردوە. باس لەوەش دەكات، كە رەنگە كردەوەكە تیرۆریستیانە بێت.
هەر لەوبارەیەوە تێریزا مای سەرۆك وەزیرانی بەریتانیا نیگەرانی لە روداوەكە دەربڕی و هاوخەمی بۆ قوربانییەكان راگەیاند. وتیشی "كردەوەكە تۆقێنەرانەیە".
هاوكات لە شوێنی روداوەكە كەسێك دەستگیركراوە كە هاواری كردووە "دەمەوێت هەموو موسڵمانان بكوژم".

ئەندامێکی سەرکردایەتی یەکێتی ئاشکرایکرد، ئەوان فشاریان لەسەر پارتی دروستکردووە بۆ ئەوەی پەرلەمانی کوردستان کارا بکرێتەوە و دەشڵێت، لەسەر پێداگری یەکێتی پارتی بەوە ڕازی بووە، کە سەرۆکایەتی پەرلەمان لای گۆڕان بمێنێتەوە.

ئارێز عەبدوڵا ئەندامی سەرکردایەتی یەکێتی، رایگەیاندووە، پێشنیازی گۆڕینی سەرۆکی پەرلەمانی کوردستان لەلایەن گۆڕانەوە پێشنیازی پارتی بووە نەک یەکێتی، ئەوەش لەو کاتەدا بووە کە پارتی ڕازی بووە بەوەی سەرۆکی پەرلەمان لەلای گۆڕان بمێنێتەوە.

وتیشی، ئەوان داوای کاراکردنەوەی پەرلەمان دەکەن و هیچ بیانویەکیش بەدی ناکەن بۆ ئەوەی پەرلەمانی پێ پەکبخرێت.

بەوتەی ئەندامەکەی سەرکردایەتی یەکێتی، بەبێ پەرلەمان ئەنجامدانی ڕێفراندۆم سەنگ و گرنگییەکی بەهێزی نابێت و یەکێتیش داوایکردوە کە سەرۆکی پەرلەمان هەر لای گۆڕان بمێنێتەوە.

ئاماژەی بۆ ئەوەشکرد، یەکێتی داوایکردووە، سەرۆکی پەرلەمان بەبێ مەرج بگەڕێتەوە سەر کارەکەی و پەرلەمان دەستبکاتەوە بە کارەکانی، ڕەتیشکردەوە یەکێتی داوایکردبێت لە دانیشتنی دووەمی پەرلەماندا گۆڕانکاری لە سەرۆکایەتی پەرلەماندا بکرێت و وتی ئەوە تەنها پێشنیازی پارتی بووە.

ڕۆژی ١٣ ی ئەم مانگە مەکتەبی سیاسی پارتی و یەکێتی کۆبوونەوە و بڕیاردرا پەرلەمانی کوردستان کارا بکرێتەوە و لە دانیشتنی دووەمی پەرلەمانی کوردستانیشدا دوای کاراکردنەوەی، دەستەی سەرۆکایەتی پەرلەمان بگۆڕدرێت، بزووتنەوەی گۆڕانیش داواکارییەکەی ڕەتکردەوە و ڕایگەیاند، کاراکردنەوەی پەرلەمان بە مەرجەوە قبوڵ ناکەن.

یەكێتی راگەیەنراوێكی بڵاوكردەوەو داوادەكات سەراپای رێوشوێنەكانی ریفراندۆم بە یاسایەك لەپەرلەمانی كوردستاندا پەسەند بكرێت.
 
دەقی راگەیەنراوی ئەنجومەنی سەركردایەتی یەكێتی:
 
سەعات (11)ی پێش نیوەڕۆی ئەمڕۆ (18/6/2017) ئەنجومەنی سەركردایەتی یەكێتی بەسەرپەرشتی كۆسرەت رەسوڵ عەلی جێگری سكرتێری گشتی، درێژەی بەكۆبوونەكانیدا.
لەم كۆبوونەوەیەدا، ئەم بڕگانە، دوای گفتوگۆیەكی ئازادانەی تێروتەسەل، پەسەندكران:
یەكەم:
(كاراكردنەوەی پەرلەمان)
یەكێتیی، لەدامەزراندنییەوە هەتا ئێستا، دروشمی مافی چارەی خۆنوسینی بۆ گەلی كوردستان، بنەمای سەرەكی خەباتی بووە، لەو روانگەیەوە، ئەنجومەنی سەركردایەتی جەختدەكاتەوە، كە یەكێتیی وەكو پێشەنگی خەباتی مافی دیموكراسیانەی چارەی خۆنوسین، داكۆكیكەری بی ئەملاو ئەولا دەبێ و تێدەكۆشی پرۆسەی ریفراندۆم لەپێناوی سەربەخۆیی، لەهەرێمی كوردستان و تەواوی ناوچە كوردستانییەكانی دابڕێندراو لەهەرێم، سەربخرێ. بەمەرجێك سەراپای رێوشوێنەكانی بە یاسایەك لەپەرلەمانی كوردستاندا پەسەند بكرێ و دەسەڵاتە تایبەتمەندییەكانی هەرێم و تەواوی دامەزراوە فەرمییەكانی تر، لەبەر رۆشنایی یاسا بەركارەكانی هەرێمی كوردستان، ئەركە نیشتمانییەكانیان بۆ سەرخستنی پرۆسەكە، راپەڕێنن و، زەمینەی كۆ دەنگی یەكڕیزی نیشتمانی بڕەخسێنن.
دووەم:
(رێككەوتنی یەكێتی و گۆڕان)
یەكێتیی ئامادەیە، رێككەوتننامەی نێوان یەكێتی و گۆڕان جێبەجێ بكات و لەو پێناوەشدا، سەركردایەتی هاوبەشی راسپێردراو، بڕگەكانی رێككەوتننامەكە، جیبَەجی بكات.
سێهەم:
(چاكسازیی و گۆڕانكاری)
لیژنەیەك پێكهات بۆ تاوتوێكردنی پرۆژەی پێشكەشكراوی مەكتەبی رێكخستن بۆ چاكسازیی و گۆڕانكاریی، لەماوەی هەفتەیەكدا پرۆژەكە گەڵاڵەی رەسمی بكەن و دابەشبكرێتە سەر ئەندامانی سەركردایەتی.
چوارەم:
(نەخشەڕێگەی یەكێتی)
وەڵامی نەخشەڕێگەی یەكێتی، لەلایەن پارتی دیموكراتی كوردستانەوە خوێندرایەوەو بڕیاردرا، هەڤاڵانی سەركردایەتی، بۆچوونی خۆیان دەربارەی بدەنە مەكتەبی سیاسی و مەكتەبی سیاسیش، لەگەڵ مەكتەبی سیاسی پارتیدا، بكەوێتە گفتوگۆ، بۆ گەیشتن بەئامانجی هاوسەنگی و شەراكەتی راستەقینە، لەهەموو ئاست و ئاراستەكاندا.
كۆبوونەوە، بۆ تەواوكردنی بڕگەكانی دیكەی پرۆگرامی سەركردایەتی، دوای جەژن، درێژە بەكۆبوونەوە دەدات. 
بەئومێدی ئەوەی، لەم قۆناغە نوێیەی راپەڕاندنی ئەركە چارەنوسسازەكاندا، یەكێتیی:
-كاریگەر بێ لەكاراكردنەوەی پەرلەمان و چارەسەركردنی كۆی كێشەكانی یاسایی و سیاسی و یەكڕیزی نیشتمانی.
-ژینگەی هەڵوێستی دیموكراسی نەتەوەیی و زەمینەی ئابوریی و كۆششی دیپلۆماسی و زەمینەی یاسایی بۆ سەرخستنی پرۆسەی ریفراندۆم، بڕەخسێنری.
-چاكسازیی و گۆڕانكاری لەناو یەكێتی و لەحكومەتدا بهێنرێنەدی، هەتا كێشە پەنگ خواردووەكانی هەناوی یەكێتی چارەسەر بكرێن و پەیڕەوی ناوخۆ بكرێتە بنەمای حزبایەتی. لەهەمانكاتدا، ئەو كار بەدەستانەی نەیانتوانیوە بەپێی پرۆژەی هەڵبژاردنی پەرلەمان و حكومەتی كوردستان، كە پەیمان و پەیامی یەكێتیی بون بۆ جەماوەر، ئەركەكانیان راپەڕێنن، لێیان بپێچرێتەوەو سەركەوتوەكانیشیان، پاداشت بكرێن.
ئەنجومەنی سەركردایەتی
یەكێیتیی نیشتمانیی كوردستان
18/6/2017

ئەنجوومەنی وەزیرانی عێراق لەبارەی ئەنجامدانی ریفراندۆمی هەرێمی كوردستانەوە هۆشداریداو جەختیشیكردەوە، كە ئەوان لەگەڵ پرۆسەكە نین.

ئەنجوومەنی وەزیرانی عێراق ئەمڕۆ یەك شەممە بەیاننامەیەكی لەسەر پرسی ئەنجامدانی ریفراندۆم بڵاوكردووەتەوە، كە تێدا هۆشداری ئەوەی داوە ئەنجامدانی ئەو پرۆسەیە قەیرانی دارایی زیاتر قووڵدەكاتەوەو خەڵكی زیاتر برسی دەكات.

ئەنجوومەنەكە جەختیشیكردووەتەوە، ئەوان لەگەڵ ئەنجامدانی پرۆسەكە نین‌و راشیگەیاندووە "هەرێمی كوردستان نابێت تاكلایەنە ئەو پرۆسەیە ئەنجامبدات، كە پێچەوانەی دەستووری عێراقە".

ئەمە لەكاتێكدایە، لایەنە سیاسییەكانی هەرێم‌و مەسعود بارزانی بڕیاریانداوە رۆژی 25/9/2017 پرۆسەی ریفراندۆم ئەنجامبدەن، كە ئەمە كاردانەوەی ناوخۆیی‌و نێودەوڵەتی بەدواوە هاتووە.

ئەنجوومەنی وەزیران ئەوەشی راگەیاندوو وەك رێكخراوی نەتەوەیەكگرتووەكان رایگەیاندووە، هیچ بەشداری هەماهەنگییەكانیان بۆ پرۆسەی ریفراندۆمی هەرێم نابێت‌و رێكاری یاسایشی لەدژ دەگرنە بەر.

ئاگرێکی گەورە لە دارستانێکی پرتوگال کەوتەوەو بەهۆیەوە 57 کەس گیانیان لەدەستدا.

حکومەتی پرتوگال رایگه‌یاند، زۆربەی خەڵکەکە لە کاتیکدا گیانیان لەدەستدا لە نێو ئۆتۆمبێلەکانیاندا لە هەوڵی خۆدەربازکردن بوون لە ناوچەی  (Pedrogao Grande)، ٥٠ کیلۆمەتر لە باشووری ڕۆژهەڵاتی کۆیمبرا. 

چەندین ئاگرکوژێنەوە لە ناو ئه‌و ٥٩ کەسەدان کە بریندار بوون.

ئەنتۆنیۆ کۆستا سەرۆک وەزیرانی‌ پرتوگال وتی "بەداخەوە، وەک دەردەکەوێت ئەمە گەورەترین ئاگری دارستانە بینیبێتمان لەم چەند ساڵەی ڕابردوودا".

وتیشی کە ژمارەی قوربانیان لەبەرزبوونەوەدایە. 

جۆرج گۆمێز وەزیری ناوخۆی پرتوگال ڕایگەیاند کە تەرمی ٣٠ کەس لەنێو ئۆتۆمبێلەکانیاندا دۆزراونەتەوەو ١٧ کەسی دیکەش لە نزیک ئۆتۆمبێلەکانیاندا دۆزراونەوە.

بەپێی وتەی ئاژانسەکانی ناوخۆی ئەو وڵاتە، شەش کەس لە پیاوانی ئاگرکوژێنەوە بە سەختی برینداربوون، هەروەها دوو کارمەندی دیکەی ون بوون.

هه‌روه‌ك بڕیاربوو كاتژمێر 11 ى پێش نیوه‌ڕۆى ئه‌مڕۆ یه‌ك شه‌ممه‌ كۆبوونه‌وه‌ى ئه‌نجومه‌نى سه‌ركردایه‌تى یه‌كێتیى نیشتمانى كوردستان له‌ شارى سلێمانى ده‌ستى پێكرد.

سه‌رچاوه‌یه‌كى ئاگادار  راگه‌یاند، كاتژمێر 11 ى پێش نیوه‌ڕۆى ئه‌مڕۆ رێكه‌وتى 18 ى 6 ى 2017 كۆبوونه‌وه‌ى ئه‌نجومه‌نى سه‌ركردایه‌تى یه‌كێتیى له‌ شارى سلێمانى ده‌ستى پێكرد.

ئاماژه‌ى به‌وه‌شكرد، كۆبوونه‌وه‌كه‌ى ئه‌مڕۆى ئه‌نجومه‌نى سه‌ركردایه‌تى یه‌كێتیى، درێژه‌پێده‌رى كۆبوونه‌وه‌كه‌ى رۆژى پێنج شه‌ممه‌ى رابردوو ده‌بێت و تایبه‌ت ده‌بێت به‌ به‌ درێژه‌دان به‌ گفتوگۆكردن له‌باره‌ى ئه‌و بابه‌تانه‌ى له‌ كارنامه‌ى كۆبوونه‌وه‌كه‌ى رابردوودا هه‌بوو.

پاش كۆتاییهاتنى كۆبوونه‌وه‌كه‌ى رۆژى پێنج شه‌ممه‌ى رابردوو رێكه‌وتى 15 ى 6 ى 2017، "مه‌لا به‌ختیار" لێپرسراوی ده‌سته‌ی كارگێڕی مه‌كته‌بی سیاسی یه‌كێتیى به‌ گه‌لی كوردستانی راگه‌یاندبوو، له‌ كۆبوونه‌وه‌كه‌ی داهاتوودا ئه‌نجومه‌نی سه‌ركردایه‌تی یه‌كێتیی بڕیار له‌سه‌ر پرسی كاراكردنه‌وه‌ی په‌رله‌مان و ریفراندۆم و هه‌ڵبژاردنه‌كانی هه‌رێم و په‌یوه‌ندی یه‌كێتیی و گۆڕان، هه‌روه‌ها یه‌كێتیی و پارتی، یه‌كێتیی له‌گه‌ڵ لایه‌نه‌كانى دیكه‌وه‌ ده‌دات.

 

الصفحة 5 من 1043

پەیوەندی

بۆ پەیوەندی کردن بە بەرێوەبەرایەتی تۆڕی هەواڵی هەولێر ئەو ئیمێل و ژمارە مۆبایلانەی خوارەوە بەکاربێنە

  • ناونیشنا : عێراق - هەولێر - بەرامبەر نەخۆشخانەی سەنتەری دڵ

  • ئیمێل : عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

  • ماڵپەر :٠٠٩٦٤٧٥٠٤٥٤٧٩٣٧

    ماڵپەر : ٠٠٩٦٤٧٥٠٤٦٦١٧٤٥