بەژداری پێ کردنی هەواڵ لە

FacebookTwitterGoogle BookmarksRSS Feed

زیاتر لە حەفتەیەكە جەنگێكی سارد لە نێوان هەولێر و بەغدا بە هێواشی هەڵگیرساوە، هێماكانی ئەو جەنگە زیاتر لە بڕیاری دەستگیركردن بۆ هەریەكە لە نەجمەدین كەریم پارێزگاری لەكارلادراوی كەركوك و رێبوار تاڵەبانی سەرۆكی ئەنجومەنی پارێزگای كەركوك خۆی نیشان دەدا.

رۆژی ٥ی حوزەیرانی ٢٠١٨ بڕیاری دەستگیركردن بۆ رێبوار تاڵەبانی سەرۆكی ئەنجومەنی پارێزگای كەركوك لەلایەن دادگای لێكۆڵینەوەی كەركوك بە تۆمەتی گەندەڵیی وخراپ بەكارهێنانی دەسەڵاتی ئیدارییەوە دەركرا. پێشتریش هەر ئەو دادگایە رۆژی ٢٢ی ئایار بڕیاری دەستگیركردنی خۆی  ودەستگرتن بەسەر هەموو ماڵ و سامانی د.نەجمەدین كەریم پارێزگاری لەسەركارلادراوی كەركوكی دەركردبوو.

دوای ئاشكرابوونی ئەو بڕیارانە لە سەرەتای ئەم مانگەدا، دەمودەس مەسعود بارزانی سەرۆكی پێشووی هەرێمی كوردستان و سەرۆكی پ.د.ك لە راگەیەنراوێكدا پشتیوانی خۆی بۆ د.نەجمەدین و رێبوار تاڵەبانی دەربڕی. بارزانی لە راگەیەنراوەكەدا وتبووی " ئەو بڕیارانە درێژكراوەی خیانەتەكانی ١٦ی ئۆكتۆبەرن" و بە نایاسایی ناوی بردوون. تائێستا تەنیا مەسعود بارزانی بەو راشكاوییەوە پشتگیرییەكانی خۆی بۆ نەجمەدین كەریم ورێبوار  تاڵەبانی دەربڕیوە.

دادگا و سیاسەت
بڕیارەكانی دادگای لێكۆڵینەوەی كەركوك سەبارەت بە پارێزگاری پێشوو و سەرۆكی ئەنجومەنی پارێزگا لەسەر بنەمای مادەكانی ٣١٦ بۆ د.نەجمەدین كەریم و ٣٣١ بۆ رێبوار تاڵەبانی دەركرابوون. كە ئەو مادانە تایبەتە بە لێكۆڵینەوەی یاسایی لە گەندەڵیی و خراپ بەكارهێنانی دەسەڵاتی گشتیی.

هەریەكە لە د.نەجمەدین كەریم و رێبوار تاڵەبانی كە ئێستا لە هەولێرەوە بە توندی پشتگیرییان لێ دەكرێت، لە لێدوانی تایبەتدا بۆ ماڵپەڕی مەكتوب، لە بایەخی ئەو بڕیارانە كەم دەكەنەوە و دەڵێن زیاتر تایپێكی سیاسیی هەیە نەك یاسایی.

ئەو دوو بەرپرسەی كەركوك كە زیاتر لە هەشت مانگە نەگەڕاونەتەوە بۆ كەركوك و دیاریش نییە كەی دەگەڕێنەوە، نكوڵی لە هەر خراپ بەكارهێنانێكی دەسەڵاتەكانیان دەكەن لەو كاتەی پارێزگار و سەرۆكی ئەنجومەن بوون.

سەبارەت بە ئامادەبوونی لە بەردەم داداگا، د. نەجمەدین كەریم بۆ مەكتوب وتی:"هەموو ‌ئەوانەی لە نزیكەوە لەگەڵ من كاریان كردبێ، دەزانن چەند ساڵ لە پێناوی سەروەری یاسا و دوورخستنەوەی دەستی حزب و سیاسییەكان تێكۆشاوم  وكارمكردووە. بۆیە سڵ لە هیچ دادگایەكی عادیلانە ناكەمەوە تا بچمە بەردەمی و پاكیی خۆم بسەلمێنم. بەڵام ئەو بریارانەی دادگای كەركوك دەریدەكات هێندەی بریارێكی سیاسییە هێندە بریارێكی یاسایی نین.‌ بۆیە لە خوێندنەوەی بریارەكان رقوكینە بە روونی دەبینرێ. ‌ ئەمە بۆ دادگا و دادوەرەكان كارێكی خراپە و بێلایەنی ئەو دادگایە دەخاتە ژێر پرسیارەوە."

د.نەجمەدین كەریم ئەم قسانەی لە كاتێكدا كرد كە چەند رۆژ پێشتر رێك لە ٧ی حوزەیران سەردانی مەسعود بارزانی كرد و بارزانیش بە توندی پشتیوانی خۆی بۆ ئەو و رێبوار تاڵەبانی دەربڕی و وتی "بەوپەڕی تواناوە لە پشتتان دەوەستم".

ریبوار تاڵەبانی وەكو د. نەجمەدین تانە لە بڕیارەكەی دادگای لێكۆڵینەوەی كەركوك دەدات و بە سیاسیی ناوی دەبات.

لە لێدوانیكدا بۆ مەكتوب رێبوار تاڵەبانی وتی:"  ئەوانەی دەكرێن بەناوی دادگاوە ‌ئیجرائاتێكی سیاسین و‌ هەوڵێكن بۆ سەندنەوەی ئەو دەسەڵاتانەی هەمانە. هەندێ لایەنی سیاسی توركمانی و عەرەبی هانی گرتنەبەری ئەم رێوشوێنانە دەدەن چونكە تائێستا ‌واژۆی من لە دام و دەزگاكانی كەركوك كار دەكرێ و ئەوان ئەمە بە لادان  لە یاسا ناوی دەبەن و دەیانەوێ لێم بسەنرێتەوە"

سەبارەت بە ئامادەبوونی لە بەردەم دادگا تاڵەبانی وتی:" بۆ من زۆر ئاساییە‌، ئامادەم بچم بۆ دادگا ئەگەر پرۆسەی دادگاییكردنەكە لە هەولێربێ چونكە من لەخۆم دڵنیام و هیچ هەڵەیەكم نەكردووە." بەم وەڵامەدا وا نیشان دەدا متمانەی بە دادگای كەركوك نییە بۆیە خوازیارە لە دادگایەكی هەولێر دادگایی بكرێت.

بەندكردن و غەرامەكردن
پارێزەر عەلی ئەحمەد كە پارێزەری رێبوار تاڵەبانیشە لەو دۆسێیەدا بۆ مەكتوب روونی دەكاتەوە مادەی ٣٣١ لە یاسای سزادانی عێراقی كە فەرمانی دەستگیركردنی رێبواری پێ دەركراوە. ئەگەر تۆمەتەكان ساغبوونەوە لەسەر سكاڵا لێكراو، ئەوا ‌سزای زیندانیی و غەرامەكردنی تێدایە‌ بۆ كەسانێك كە فەرمانبەر و راسپێردراوبن بە خزمەتی گشتیی ئەگەربێتو بەئەنقەست پێچەوانەی ئەركەكانی كاربكات یان كارەكانی بە باشی بەجێنەهێنێ بە ئامانجی زیانگەیاندن لە بەرژەوەندی لایەنێك و دەوڵەتێك.

لیستەكانی عەرەب ‌و توركمان لە ئەنجومەنی پارێزگای كەركوك، پێشتر لە راگەیەنراوێكدا سێ‌ داواكارییان خستەڕوو لە نێویاندا دورخستنەوەی رێبوار تاڵەبانی لە هەردوو پۆستی سەرۆكی ئەنجومەن بە وەكالەت‌ و جێگری سەرۆكی ئەنجومەنی پارێزتگا، تائێستاش ئەو دۆسیەیە بە هەڵپەسێردراوی ماوەتەوە و دانیشتنەكانی ئەنجومەن پەكیكەوتووە.

عەلی مەهدی ئەندامی ئەنجومەنی پارێزگای كەركوك لەسەر لیستی بەرەی توركمانی لە لێدوانێكدا بۆ ماڵپەڕی مەكتوب لەمبارەیەوە وتی:"سەرۆكی ئەنجومەنی پارێزگای كەركوك بە وەكالەت، مخالفی هەموو یاسا و سیستەمە كارگێرییەكانە لە ناوخۆی كەركوكدا، هەر لە ئامادەنەبوونی لە كەركوك و ئیمزاكردن لەسەر نووسراوەكان لە هەولێرەوە. ئەوە هەشت مانگە ئامادەیی نییە لە ئەنجومەنی پارێزگا و خۆی شاردوەتەوە لە بەرگێكی سیاسی دا. بۆ بریاری دەستگیركردنەكەشی، ئەوە تایبەت بوو بە دیوانی چاودێری دارایی نەك شتی تر."

بەغدا بێدەنگە
ئەم مشتومڕانە لەنێوان هەولێر و دادگای كەركوك و چەند لایەنێكی عەرەب و توركمانی لە كاتێكدایە تائێستا حكومەتی بەغدا لەمبارەیەوە بە رەسمی هیچی نەوتووە، بەڵام دانەنانی پارێزگارێكی هەمیشەیی بۆ كەركوك و جدی نەبوون لەسەر چارەسەركردنی كێشەكانی كەركوك، نیشانەی ئەوەیە دەیەوێ لەڕێی دادگاوە د.نەجمەدین و رێبوار تاڵەبانی كە لە هەولێرەوە زۆر پشتگیریی دەكرێن دەستگیر بكەن. ئەمەش نیشانەی جەنگێكی ساردە لەنیوان ئەو دوو پایتەختەدا كە كەمترین خاڵ هەیە لەسەری كۆك  وتەبابن. هەرگیز لە دوو شار ناچن لەناو نەخشەی وڵاتێكدابن. بەڵام ئێستا تارمایی ئەم جەنگە ساردە لە ئاسمانی كەركوكدا دەبینرێ.

ئەندامێكی حیزبی شیوعی رایگەیاند، پێكهێنانی هاوپەیمانی لەنێوان مقتەدا سەدرو سەرۆكی لیستی سائیروون‌و هادی عامری سەرۆكی لیستی فەتح بۆ ئەوانیش شۆكهێنەر رووە.

رۆژنامەی "خلیجیە"ی لەزاری ئەو ئەندامە باڵایەی حیزبی شیوعی ئەوەی بڵاوكردووەتەوە، كە ئەوان وەك لیستێكی مەدەنی چاوەڕوانی ئەوە نەبوون سائیروون لەگەڵ فەتح هاوپەیمانی بكات، كە ئەوەی دووەمیان هێزێكی سەربازین.

شەوی رابردوو بەشێوەیەكی چاوەڕواننەكراو لیستی سائیروون‌و فەتح هاوپەیمانییان پێكهێنا، كە لایەنە شیوعییەكانیش لەلیستی یەكەمن‌و چەند كاندیدێكیان بۆ پەرلەمان دەرچووە.

ئەو سەركردەیەی حیزبی شیوعی، كە ناوی بڵاونەكراوەتەوە، ئەوەشی راگەیاندووە، فشارێكی ئێرانی هەبووە، بۆیە ئەو هاوپەیمانییە بەو خێراییە پێكهێنراوە.

مه‌رجی حكومه‌ت بۆ زیادكردنی موچه‌ ئاشكرا كرا
حكومه‌تی هه‌رێم مه‌رجی هه‌یه‌ بۆئه‌وه‌ی كه‌مترین موچه‌ی خانه‌نشینی بكات به‌ 400 هه‌زار دینار، ئه‌ندامێكی لیژنه‌ی دارایی له‌په‌رله‌مانی كوردستانیش رایده‌گه‌یه‌نێت: حكومه‌ت به‌ مه‌رجی كۆتایی هاتنی قه‌یرانی دارایی، ئاماده‌یه‌ موچه‌ی خانه‌نشینی زیاد بكات.

 

به‌پێی راپۆرتی هاوبه‌شی هه‌ردوو لیژنه‌ی یاسایی و دارایی له‌په‌رله‌مانی كوردستان، كه‌مترین موچه‌ی خانه‌نشینی بۆ 400 هه‌زار دینار زیاد ده‌كرێت، به‌ڵام بڕیاره‌كه‌ له‌ 1ی 1ی 2019ه‌وه‌ جێبه‌جێده‌كرێت.

د.شێركۆ جه‌وده‌ت، ئه‌ندامی لیژنه‌ی دارایی و كاروباری ئابووری له‌په‌رله‌مانی كوردستان راگه‌یاندوە: قسه‌مان له‌گه‌ڵ حكومه‌ت كردووه‌و ده‌توانێت كه‌مترین موچه‌ی خانه‌نشینی بكات به‌ 400 هه‌زار دینار، به‌ڵام مه‌رجی هه‌یه‌.

وتیشی: "مه‌رجه‌كه‌ی حكومه‌تی ئه‌وه‌یه‌ كه‌ هه‌ركاتێك قه‌یرانی دارایی كۆتاییهات، ئه‌وكات ده‌توانێت كه‌مترین موچه‌ی خانه‌نشینی بكات به‌ 400 هه‌زار دینار، به‌ڵام ئێمه‌ باوه‌ڕمان به‌و قسه‌یه‌ی حكومه‌ت نییه‌، چونكه‌ ئێستا داهاتی حكومه‌ت به‌رزبۆته‌وه‌و به‌دڵنیاییه‌وه‌ ده‌توانێت زیادكردنی موچه‌ جێبه‌جێ بكات".

له‌لایه‌ن خۆشییه‌وه‌، شوان شێخ ئه‌حمه‌د ئه‌ندامی لیژنه‌ی یاسایی له‌په‌رله‌مانی كوردستان  راگه‌یاندوە: هه‌ردوو لیژنه‌ی یاسایی و دارایی له‌سه‌ر بنه‌مای زیادبوونی نرخی نه‌وت و داهاتی حكومه‌تی هه‌رێم به‌باشمانزانی كه‌مترین موچه‌ی خانه‌نشینی بكرێت به‌ 400 هه‌زار دینار، به‌ڵام مه‌رج نییه‌ راپۆرتی هاوبه‌شی هه‌ردوو لیژنه‌كه‌ له‌دانیشتنی په‌رله‌مان وه‌كخۆی جێبه‌جێ بكرێت.

وتیشی: "ئه‌گه‌ر حكومه‌ت ره‌زامه‌ند بێت له‌سه‌ر زیادكردنی موچه‌ی خانه‌نیشنی، له‌ڕۆژی 1ی 1ی 2019ه‌وه‌ سه‌رجه‌م ئه‌و خانه‌نشینانه‌ی موچه‌كانیان 300 هه‌زار دیناره‌، ده‌كرێت به‌ 400 هه‌زار دینار".

بەڕێوەبەرایەتیی پۆلیسی هەولێر، بە هەماهەنگیی ئاسایش و پۆلیسی هاتوچۆ و پۆلیسی بەرگریی شارستانی و هێزە ئەمنییەكانی دیكە، پلانێكی ئەمنیی بۆ ڕۆژانی جەژنی ڕەمەزان داڕشتووە.

لیوای مافپەروەر عەبدولخالق تەڵعەت، بەڕێوەبەری پۆلیسی پارێزگای هەولێر، بۆ مێدیاكان ڕایگەیاند، دوای كۆبوونەوە لەگەڵ بەرپرسانی هێزە ئەمنییەكانی هەولێر و دەوروبەری، بە هەماهەنگیی ئاسایش و پۆلیسی هاتوچۆ و بەرگریی شارستانی و سەرجەم هێزە تەناهییەكانی دیكە، پلانێكی ئەمنیی تۆكمەیان بۆ ڕۆژانی جەژنی ڕەمەزان داڕشتووە.

بە وتەی بەڕێوەبەری پۆلیسی پارێزگای هەولێر، پلانە ئەمنییەكە لە پێنجشەممەوە تا دوای جەژن بەردەوام دەبێت و جگە لەوەی تیمەكانی هێزەكانی ئاسایشی ناوخۆ لە دەرەوە و ناوەوەی شار بڵاوەیان پێ دەكرێت، لەناو كۆڵان و گەڕەكەكانیشدا مەفرەزەكانی هێزە هاوبەشە ئەمنییەكە، سەر و ماڵی هاونیشتمانیان دەپارێزن و دۆخی تەناهی دەخەنە ژێر كۆنتڕۆڵەوە.

لیوا عەبدولخالق دەشڵێ، پێشبینی دەكرێت لە ڕۆژانی جەژندا، بە هەزاران كەس بە مەبەستی پیرۆزكردنی جەژن و بەسەربردنی كاتێكی خۆش، بێنە پارێزگاكانی هەرێمی كوردستان.

 

له‌به‌رامبه‌ر داوكاریه‌كانی حكومه‌تی هه‌رێم له‌ په‌كه‌كه‌ بۆ جێهێشتنی قه‌ندیل، به‌رپرسێكی ئه‌و حزبه‌ ده‌ڵێت، كوردستان وڵاتی ئێمه‌یه‌، داواش ده‌كات حكومه‌تی هه‌رێم له‌ بری ئه‌و داوایه‌، له‌سه‌ر هێرشه‌كان و بوونی سوپای توركیا له‌سه‌ر خاكی هه‌رێم بێته‌ ده‌نگ.
سه‌رحه‌د ڤارتۆ وته‌بێژی كۆما جڤاكێن كوردستان (كه‌جه‌كه‌) له‌ میانی به‌رنامه‌یەکیدا "، رایگه‌یاند: بیركردنه‌وه‌یه‌كی نالۆجیكی و مه‌ترسیداره‌ ئه‌گه‌ر هۆكاری هێرشه‌كانی توركیا بۆ بوونی گه‌ریلاكانی په‌كه‌كه‌ له‌ قه‌ندیل و زاپ ببه‌سترێته‌وه‌، چونكه‌ وه‌ك ئه‌وه‌ وایه‌ بوترێت، ئه‌گه‌ر كورد له‌ دژی رژێمی به‌عس نه‌وه‌ستایه‌ته‌وه‌، كیمیاباران و ئه‌نفالی به‌سه‌ردا نه‌ده‌هات، ئه‌گه‌ر كورد به‌رامبه‌ر به‌ به‌عس به‌رگری نه‌كردایه‌، له‌ بنه‌ڕه‌تدا كورد نه‌ده‌ما.
له‌ درێژه‌ی قسه‌كانیدا وته‌بێژی كه‌جه‌كه‌ وه‌ڵامی سه‌فین دزه‌یی وته‌بێژی حكومه‌تی هه‌رێمی دایه‌وه‌ و وتی: وته‌بێژی حكومه‌تی هه‌رێم ده‌ڵێت، ئه‌گه‌ر په‌كه‌كه‌ له‌ قه‌ندیل نه‌بێت، توركیاش ئۆپراسیۆن ئه‌نجام نادات، له‌و رووه‌وه‌ وتی: كوردستان وه‌ڵاتی ئێمه‌یه‌، ئه‌ركی حكومه‌تی هه‌رێمیش بریتیه‌ له‌وه‌ی كه‌ دژی داگیركه‌ری توركیا بوه‌ستێته‌وه‌، هه‌روه‌ها وه‌ڵامی ئه‌و پرسیاره‌ بداته‌وه‌، كه‌ بۆچی له‌ ساڵی 1997 ه‌وه‌ نزیكه‌ی 20 باره‌گای توركیا له‌ باشوری كوردستان، به‌ڵام یه‌ك به‌رپرسی حكومه‌تی هه‌رێم و پارتی ئه‌و هێزانه‌یان به‌ داگیركه‌ر ناونه‌بردووه‌ و داوایان نه‌كردووه‌ خاكی باشور جێبهێڵن، به‌ڵام له‌ به‌رامبه‌ردا هه‌زارجار داوایان كردووه‌ په‌كه‌كه‌ باشور جێبهێڵێت.

بەھۆی کێشەی ئەنجامی ھەڵبژاردنە پەرلەمانیەکەی عیراقەوە، ھۆشداری توند لەتێکچونی دۆخی ئەمنی عیراق دەدرێت، بەرپرسێکی سەربازیی یەکێتیش مەترسی دروستبونی شەڕی ماڵ بەماڵ ئاشکرادەکات و ڕاشیدەگەیەنێت، "داعش خۆی بۆ دەرفەتێکی لەو شێوەیە مەڵاسداوە، بۆئەوەی پەلامارەکانی دەستپێبکاتەوە".

 

 

لیوا مەردان چاوشین جێگری فەرماندەی یەکەی ٧٠ی ھێزەکانی پێشمەرگە  ڕاگەیاند، "ئەگەر بڕیارەکانی ئەنجومەنی نوێنەران جێبەجێبکرێن و گۆڕانکاریی بەسەر ئەنجامی ھەڵبژاردنەکاندا بێت، ئەوە نەک شەڕی کۆڵان بەکۆڵان، بەڵکو شەڕی ماڵ بەماڵیش لەنێوان شیعەکاندا دروستدەبێت".

وتیشی:"ئێستا ناوماڵی شیعە لەوپەڕی لێکترازاندایەو زۆربەی گروپ و لایەنە شیعەکانیش خاوەنی ھێزی چەکدارن، ئەمەش مەترسییە".

بەوتەی مەردان چاوشین، کۆمەڵێک خەڵکی ھەلپەرستی کوردیش بون بەچاوساغی تۆرانییەکان و عەرەبە شۆڤینیەکانی کەرکوک، بەمەبەستی تانەدان لەئەنجامی ھەڵبژاردنەکانی کەرکوک و دواتر ھەڵوەشاندنەوەی دەنگدانی تایبەت لەھەرێمی کوردستان.

فەرماندە سەربازییەکەی یەکێتیی ئەوەشی ڕاگەیاند، "مەترسیی گەورەو جدی لەعیراق ھەیەو ھۆشدایشیدا، ئێستا تیرۆریستانی داعش خۆیان کۆکردۆتەوەو بەدوای دەرفەتێکی لەو شێوەیە دەگەڕێن بۆ ئەوەی ھێرش و پەلامارەکانیان دەستپێبکەنەوە".

 

 

یەکێتیی ئامادەکارییەکان دەستپێدەکات
مەکتەبی ھەڵبژاردنی یەکێتیی نیشتیمانی کوردستان ئامادەکارییەکان بۆ ھەڵبژاردنی پەرلەمانی کوردستان دەستپێدەکات و وتەبێژی مەکتەبەش چەند زانیاریەکی نوێ لەوبارەیەوە ئاشکرادەکات، ڕاشیدەگەیەنێت، "دیاریکردنی ناوی کاندیدەکانی یەکێتیی و یەکلاکردنەوەی  لەلایەن مەڵبەندەکانەوە دەبێت، بۆ ئەوەش چەند پێوەرێک دەستنیشانکراوە".

 

 

 وتەبێژی مەکتەبی ھەڵبژاردنی یەکێتیی نیشتیمانی کوردستان  ڕاگەیاندوە، "وەک یەکێتیی ئامادەکارییەکانمان بۆ ھەڵبژاردنی پەرلەمان دەستپێکردوەو ئەو  ھەنگاوانەشی پێویستبێت بۆ پرۆسەکە گیراوەتەبەر".

وتیشی:"کاندیدەکان لەلایەن مەڵبەندەکانی یەکێتیەوە دەستنیشاندەکرێن و چەند پێوەرێکیش بۆ ئەو مەبەستە دانراوە، جگەلەوەش مەڵبەندەکانی یەکێتیی پێوەی پابەنددەبن و دواتر لەڕێگەی سیڤیەوە کاندیدەکان لەمەکتەبی ھەڵبژاردن یەکلادەکرێنەوە".

ئاشکراشیکرد، "١٨ بۆ ٢٠ی ئەم مانگە دوا وادەیە بۆ پێکھێنانی ھاوپەیمانێتی لایەنەکان لەلایەن کۆمسیۆنی ھەڵبژاردنەکان، دواتریش دەست بەپێدانی ژمارەی قەوارە سیاسیەکان دەکرێت، بەڵام ھیچ وادەیەک بۆ پێشکەشکردنی ناوی کاندیدی لایەنە سیاسیەکان بۆ ھەڵبژاردنی پەرلەمان دیارینەکراوەو دواتر کۆمسیۆن بڕیاری لەبارەوە دەدات".

تەندروستی هەولێر رایگەیاند، دوێنێ شەو لە یەکێک لە مزگەوتەکانی شاری هەولێر پیاوێکی بەساڵاچوو لە شەوی قەدردا لە یەکێک لە مزگەوتەکانی شاری هەولێر گیانی لەدەستداوە.

فاخر هەرکی، وتەبێژی تەندروستی هەولێر رایگەیاند، "دوێنێ شەو لە کاتی نوێژی شەوی قەدردا لەمزگەوتی حاجی جەودەت ئەسعەدی گەڕەکی 32 پارکی هەولێر هاوڵاتییەک لەکاتی مانەوەی لەوشەوەدا گیانی لەدەستدا".

وته‌یێژه‌كه‌ی ته‌ندروستی هه‌ولێر بۆ ئێن ئاڕتی روونیشکردوەته‌وە، لە پزیشکی دادوەری هەولێر پشکنین بۆ تەرمی ئەو پیاوە کراوە، بەڵام تا ئێستا روون نیە هۆکاری چی بووە کە کۆچی دوایی کردووە تەنها رووداوێکی کتوپڕبووە.

كۆبوونەوە مێژوویـیەكەی نێوان دۆناڵد ترەمپ، سەرۆكی ویلایەتە یەكگرتووەكانی ئەمەریكا و كیم جۆنگ ئون، سەرۆكی كۆریای باكور ئەمڕۆ سێشەممە لە ئوتێلی كاپـێلای دورگەی سێنتۆسای لە سینگاپـور كۆبوونەوە.

سەرەتا لە بەردەم ئاڵاكانی ئەمەریكا و كۆریای باكور تەوقەیان لەگەڵ یەكتر كرد و پاشان پـێكەوە بەرەو شوێنی كۆبوونەوەكەیان بەرێككەوتن و لەوێ بە كورتی بە پەیامنێرانیان راگەیاند، كە هیوادارن كۆبوونەوەكەیان سەركەوتوو بێت.

دۆناڵد ترەمپ رایگەیاند، پـێشبینی دەكات پەیوەندیـیەكی زۆر باش لە نێوانیان دروستببێت. 

لای خۆیەوە كیم جۆنگ ئون ئاماژەی بەوەكرد، كۆریای باكور و ئەمەریكا زاڵبوون بەسەر كۆسپە مێژوویـیەكانی نێوانیان و ئێستا لە سینگاپور كۆدەبنەوە، وتیشی ئەوەی ئەمڕۆ هاتووەتە دی هەروا بە سانایی نەبووە.

بەپـێی بەرنامەی كۆبوونەوەكان، دەبوایە سەرەتا بۆ ماوەی 2 كاژمێر تەنیا خۆیان بە ئامادەبوونی وەرگێڕەكانیان كۆببنەوە، بەڵام كۆبوونەوە دوو قۆڵیـیەكەی نێوانیان لە 48 خولەك زیاتری نەخایاند و كۆبوونەوە گشتیـیەكە بە ئامادەبوونی كاربەدەستانی دیكەی هەردوولا

دەستیپـێكرد.

نورەددین جانیكلی وەزیری بەرگری توركیا رایگەیاند، سوپای وڵاتەكەی لەناو خاكی عێراق‌و هەرێمی كوردستان دەمێنێتەوە.

نورەددین جانیكلی راشیگەیاند، تا ئەو كاتەی هێزەكانی پەكەكە لەعێراق‌و ناوچەكانی هەرێمی كوردستان بمێنن، سوپای توركیاش لەو وڵاتە ناكشێنەوە.

وەزیری بەرگری توركیا ئەوەشی راگەیاند ئۆپەراسیۆنی قەندیل بۆ پاراستنی ئەمنییەتی سنوورەكان ئەنجامدەدەین، كە ئۆپەراسیۆنەكە كاتییە.

جانیكلی هەروەها رایگەیاند، ئۆپەراسیۆنی ئەمجارە جیاوازە، چونكە لەو شوێنە ئەنجامدەدرێت، كە بووەتە هۆی مەترسی بۆ سەر ئاسایشی توركیا.

الصفحة 4 من 1271

 

پەیوەندی

بۆ پەیوەندی کردن بە بەرێوەبەرایەتی تۆڕی هەواڵی هەولێر ئەو ئیمێل و ژمارە مۆبایلانەی خوارەوە بەکاربێنە

  • ناونیشنا : عێراق - هەولێر - بەرامبەر نەخۆشخانەی سەنتەری دڵ

  • ئیمێل : عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

  • ماڵپەر :٠٠٩٦٤٧٥٠٤٥٤٧٩٣٧

    ماڵپەر : ٠٠٩٦٤٧٥٠٤٦٦١٧٤٥