بەژداری پێ کردنی هەواڵ لە

FacebookTwitterGoogle BookmarksRSS Feed

وەزارەتی دارایی ھەرێمی كوردستان، بریاریداوە، بودجەی وەزارەتی پێشمەرگەو موچەی پلەباڵاكانی وەزارەتەكە كەم بكاتەوە بەڕێژەی سەدا 33.

بەرپرسێكی وەزارەتی پێشمەرگە  رایگەیاند، لە سەروو لیواوەو فەرماندەكان موچەكانیان كەم دەكرێتەوەو بە گشتی رێژەی سەدا 33ی بودجەی وەزارەتەكە كەمدەكرێتەوە.

ئەو بەرپرسە وتیشی" لە ئێستادا مووچەی ئەو كەسانە قابیلی دەستكاریكردنە بە تایبەت ئەوانەی پلەكەیان لیوایە".

ئەمەش لە كاتێكدایە حكومەتی هەرێم بەهۆی لەدەستدانی زۆربەی سەرچاوەكانی داهات و نادیاری داهاتی مانگانەوە، جارێكی تر بەشێك لە مووچەی كەمكردەوە.

لە مانگی دووی ساڵی ڕابردوەوە، حكومەتی هەرێم مووچەی فەرمانبەرانی بۆ كەمتر لە نیوە كەمكردەوە و لە ماوەی ڕابردویشدا چەندجارێك ڕایگەیاند، مووچەی فەرمانبەران زیاد دەكاتەوە، بەڵام ئێستا لەبری زیادكردنەوە، مووچەی ئەوانەش، كە پاشەكەوتی لێ‌ نەكراوە كەمدەكرێتەوە و دابەشكردنی نیومووچەش دەبێتە دوو مانگ جارێك.

ئه‌مینداری یه‌كگرتووی ئیسلامی كوردستان ئاشكرایكرد، "وڵاتانی ناوچەكە بەهەرێمی كوردستانیشەوە نەیانتوانی هەڵوێستێكیان به‌رامبه‌ر كێشه‌ی قودس هه‌بێت، یان ناوێرن هه‌ڵوێستیان هه‌بێت".

سەڵاحەدین بەهائه‌دین ئەمینداری گشتی یەكگرتووی ئیسلامیی كوردستان، سه‌باره‌ت به‌دانپادانانی ئه‌مریكا به‌وه‌ی قودس پایته‌ختی ئیسرائیله‌ ڕایگه‌یاند، "قودس و مزگەوتی ئەقسا بۆ موسڵمانان و ئومەتی ئیسلامی بە گشتی یەكێكە لە موقەدەساتەكان، موقەدەساتیش شتێك نیە موساوەمەی لەسەر بكرێت یان چاوپۆشی لێبكرێت، ئەم بڕیارەش بڕیارێكی هەڵە و خەتایە بەرامبەر بە ئومەتی ئیسلام و موقەدەساتی موسڵمانان، جگە لەوەش موقەدەساتی مەسیحییەكانیشە، كردنی قودس بە پایتەختی ئیسرائیل خزمەتێك ناكات تەنانەت بە ئیسرائیل خۆیشی" ئه‌وه‌ش به‌گوێره‌ی ئاژانسی ئه‌نادۆڵ

سه‌باره‌ت به‌لێكه‌وته‌كانی ئه‌و بڕیاره‌ سه‌ڵاحه‌دین به‌هائه‌دین ڕایگه‌یاند، "دەبێتە هۆی زیاتركردنی گرژییەكان و ئەو ئاشتیەش كە بڕیارە ببێت و چەندین ساڵە قسەی لەسەر دەكەن، به‌و بڕیاره‌ی ئه‌مریكا هەمووی لەبار دەبات، هاوكات هەڵوەشاندنەوەی زۆرێك لەو پلان و بەرنامانەشە كە بۆ ئارامكردنەوەی دۆخی رۆژهەڵاتی ناوەڕاست دروست دەكرێت".

 ئه‌مینداری یه‌كگرتوو ئاماژه‌ی به‌وه‌شداوه‌،"بڕیارەكە هەڵەیەكی گەورەیە چونكه‌ رەنگە ئیسرائیلییەكان خۆیان بیریشیان لێنەكردبێتەوە، كە بڕیارێكی وەها بدرێت بەم پەلەیە و بەو شێوەیەی كە درا، وەك خۆم و وەك حزبیش ئیدانەی ئەو بڕیارەمان كردووە و چەندین بەیاننامە و نوسینمان لەسەر ئەو پرسە بڵاوكردۆتەوە كە بە هەڵەیەكی گەورەی دەزانم، چونكە موسڵمانان هەرگیزیش چاوپۆشی ناكەن لەوە"

سه‌باره‌ت به‌هه‌ڵوێستی وڵاتانیش له‌باره‌ی بڕیاره‌كه‌ی سه‌رۆكی ئه‌مریكاوه‌، ئه‌مینداری یه‌كگرتوو ڕایگه‌یاند، "وڵاتانی ناوچەكە بە هەرێمی كوردستانیشەوە نەیانتوانی هەڵوێستێكیان هه‌بێت، یان ناوێرن یان ئەوەندە دەرك به‌شتەكان ناكەن و هەست ناكەن ئەو هاوكێشەیە چەندە مەترسیدارە، بەڵام ئەوە هیچ لە بابەتەكە و حەقانیەتی بابەتەكە و لە حەقیقەتی مێژوویی مزگەوتی ئەقسا ناگۆڕێت، كە یەكەم قیبلەی موسڵمانانە و موقەدەساتە، هەر كەمتەرخەمییەك بەرامبەر مزگەوتی ئەقسا كەمتەرخەمییە بەرامبەر كەعبە و مزگەوتی نەبەوی، چونكە ئەو سێ‌ مزگەوتە سێ‌ مزگەوتی موقەدەسی موسڵمانن". 

ئه‌ندامێكی په‌رله‌مانی كوردستان له‌ فراكسیۆنی پارتی، رایده‌گه‌یه‌نێت، دەستەی سەرۆکایەتی پەرلەمانی کوردستان، دانیشتنی سبەینیێی پەرلەمانی بۆ رۆژی یەکشەممەی داهاتوو دواخستووه‌ و هۆكاره‌كه‌ی نازانن.

پەرلەمانتارێک، لە په‌رله‌مانی كوردستان  راگه‌یاندووە: دانیشتنه‌كه‌ی په‌رله‌مانی كوردستان بۆ گفتوگۆكردن له‌سه‌ر پڕۆژه‌ یاسای لێبوردنی گشتی بۆ رۆژی یه‌كشه‌ممه‌ 16ی كانوونی یه‌كه‌می 2017 دواخرا.

راشیگه‌یاند: هۆكاری دواخستنی دانیشتنه‌كه‌ی په‌رله‌مان بۆ رۆژی یه‌كشه‌ممه‌ی داهاتوو نازانن.

هاوكات ئایدن مه‌عروف، له‌ لیژنه‌ی یاسایی په‌رله‌مانی كوردستان رایگه‌یاندووه‌، ئێستا کارەکانی پرۆژە یاسای لێبوردنی گشتی تەواو کراوە، کە لە 15 ماددە پێکهاتووە و ئامادەیە بخرێتە بەرنامەی کاری دانیشتنی پەرلەمانەوە.

بڕیاربوو رۆژی چوارشەممە پەرلەمانی کوردستان کۆبوونەوەی ئاسایی خۆی گرێ بدات، بەڵام بەهۆی دانانی پرژەی یاسای لێبوردنی گشتی لەو کۆبوونەوەیەدا، دانیشتنەکە دواخرا بۆ رۆژی یەکشەممە دواخرا.

ئاراس شێخ جەنگی، نامەیەک ئاراستەی پەرلەمانی کوردستان دەکات و رایدەگەیەنێت کە ئامادەیە چەندین زانیاری ورد و گرنگ سەبارەت بە لەدەستدانی کەرکوک لە کۆبونەوەیەکی کراوەی پەرلەماندا بخاتە ڕوو.

ئاراس شێخ جەنگی، لەو نامەیەیدا کە ئەمڕۆ سێشەممە 12ی كانوونی یه‌كه‌می 2017، بڵاویکردەوە رایگەیاند، '' بەداخێكی زۆرەوە هێشتا ئەو قسەڵۆك و وتی وتیانە هەر ماون كە گوایە لەدەستدانی كەركوكی خۆشەویست و ناوچەكانی تری كوردستان بەهۆی (خیانەت) و رێكەوتنی نهێنی یەوە بووە لەگەڵ هێزە عیراقی و ئێرانی یەكان وە لەبەر ئەوەی بەندە هەندێك زانیاری گرنگ و وردم لایە دەربارەی ئەو كارەساتە''.

هەروەها دەشڵێت: "بۆیە لە رێی ئەم نامەیەوە ئێوە و هەموو خەڵكی كوردستان ئاگادار ئەكەم كە ئامادەم بێم لەبەردەمی ئێوەی بەڕێزدا و بە ئامادەیی تێكڕای دەزگا ئیعلامیەكان هەموو راستیەكان سەبارەت بەو بابەتە ئاشكرا بكەم بەمەرجێك دانیشتنەكە كراوە بێت و راستەوخۆ پەخش بكرێت''.

ئاراس شێخ جەنگی لەبارەی هۆکاری ئەم داوایەی لە پەرلەمان، دەڵێت '' بۆ ئەوەی كۆتایی بهێنرێ‌ بەم درۆ و دەلەسانەی كە جگە لە چەواشەكردنی رای گشتی هیچ مەبەست و مەرامێكی نییە. چاوەڕێی وەڵامی بەڕێزتانم لەگەڵ رێزی بێ‌ پایانمدا''.

دوای ئه‌نجامدانی ریفراندۆم له‌ هه‌رێمی كوردستان و ناوچه‌ جێ ناكۆكه‌كان، هێزه‌ عیراقییه‌كان له‌ هه‌ڵمه‌تێكی فراواندا توانیان زۆربه‌ی ناوچه‌ جێناكۆكه‌كان كۆنتڕۆڵ بكه‌نه‌وه‌ و پێشمه‌رگه‌ش له‌و ناوچانه‌ پاشه‌كشه‌ی كرد.

هاوكات له‌سه‌ر پرسی كشانه‌وه‌ی پێشمه‌رگه‌ له‌ كه‌ركوك، لێدوانی جیاواز بڵاوكرایه‌وه‌ و تا ئێستا هۆكاره‌ راسته‌قینه‌كه‌ی ئاشكرا نه‌كراوه‌.


 
دەقی نامەکەی ئاراس شێخ جەنگی بۆ پەرلەمانی کوردستان: 

بەڕێزان.. خوشك و برایانی پەڕلەمانتار لە پەڕلەمانی كوردستان
سڵاوێكی گەرم
بەداخێكی زۆرەوە هێشتا ئەو قسەڵۆك و وتی وتیانە هەر ماون كە گوایە لەدەستدانی كەركوكی خۆشەویست و ناوچەكانی تری كوردستان بەهۆی (خیانەت) و رێكەوتنی نهێنی یەوە بووە لەگەڵ هێزە عێراقی و ئێرانی یەكان وە لەبەر ئەوەی بەندە هەندێك زانیاری گرنگ و وردم لایە دەربارەی ئەو كارەساتە، بۆیە لەڕێ‌ ی ئەم نامەیەوە ئێوە و هەموو خەڵكی كوردستان ئاگادار ئەكەم كە ئامادەم بێم لەبەردەمی ئێوەی بەڕێزدا و بە ئامادەیی تێكڕای دەزگا ئیعلامیەكان هەموو راستیەكان سەبارەت بەو بابەتە ئاشكرا بكەم بەمەرجێك دانیشتنەكە كراوە بێت و راستەوخۆ پەخش بكرێ‌ بۆ ئەوەی كۆتایی بهێنرێ‌ بەم درۆ و دەلەسانەی كە جگە لە چەواشەكردنی رای گشتی هیچ مەبەست و مەرامێكی نی یە. چاوەڕێ‌ ی وەڵامی بەڕێزتانم لەگەڵ رێزی بێ‌ پایانمدا.
 
                                                                     براتان 
                                                              ئاراس شێخ جەنگی 
                                                                   12/12/ 2017​

جێگری لێپرسراوی مەڵبەندی حەمرینی یەكێتی رایگەیاند، لە ئەنجامی بۆردومانی ناوەندی قەزای دوزخورماتوو یەك كوژراو و چەند بریندارێكی لێكەوتووەتەوەو "سوپای عێراقیش بە هەڕەمەكی بۆردومانی چەند ناوچەیەكی كردووە".

حەسەن بارام، جێگری لێپرسراوی مەڵبەندی حەمرینی یەكێتیی  ڕاگەیاند، "چەكدارانی حەشدی شەعبی توركمان بارودۆخی شارەكەیان پێ كۆنتڕۆڵ ناكرێت، بۆیە بە بەردەوامی پێكدادان ڕوو دەدات، لەو نێوەندەشدا گروپەكانی داعش خۆیان ڕێكخستووەتەوە و چالاكی سەربازی ئەنجامدەدەن".

ئاماژەی بەوەشكرد، "ئەو وتانەی حەشدی شەعبی ڕاستنین كە دەڵێن تۆپبارانی خورماتوو گروپێكی خۆبەخش كردویانە،  ئاڕاستەكردنی ئەو گوللە هاوەنانە بۆ ناوەندی قەزاكە تاوانباركردنی نا ڕاستەوخۆیە و سەچاوەی تەقاندنی گوللە هاوەنەكان دیارنین"

بارام وتیشی، "بەپێی زانیارییەكانی ئێمە پێدەچێت كاری ئەو گروپە چەكدارانەی داعش بێت، كە ماوەیەكە لە زنجیرە چیاكانی نزیك لە خورماتوو جموجوڵیان هەیە".

ئەوەشی خستەڕوو، شەوی ڕابردوو ئەو گروپەی كە بە وتەی ئەو "چەكداری داعشن" هێرشیان كردووەتە سەر قەزای خورماتوو بۆیە گومانەكە لەسەر ئەوان زۆرترە، تا ئێستاش  كوژراوێك و چەند بریندارێك هەیە  رونیشیكردەوە، "گروپەكانی حەشدی شەعبی بە هاوەن و دۆشكە و چەكی دیكە بە ئاڕاستەی  گوندنشینانی ناحیە نەوجوڵ بۆردومان دەكەن، دوو فڕۆكەی سەربازی سوپای عێراقیش بە شێوەیەكی هەڕەمەكی هەندێك لە گوندەكانی دەوروبەری خورماتوویان بۆردومان كردووە".

پێشتر عەلی حسێن وتەبێژی حەشدی شەعبی بەخەندان-ی راگەیاندبوو، "ئەو بۆردومانە لەناوچە شاخاوییەكانی دەوربەری خورماتووەوە كراوەتە سەر خورماتوو لەلایەن گروپێكی خۆبەخشەوە، دوای ئەوە دوێنێ هەڕەشەیان كردبوو".

وتیشی، "بەهۆی بۆردومانەكەوە شەهیدێك و چوار بریندار هەیە كە سەرجەمیان مەدەنین".

ئەوەشی خستەڕوو، ئەوان لەحاڵەتی ئامادەباشیدان و دۆخی نائاسایی لە خورماتوو راگەیەندراوەو لە سەرجەم قوتابخانە و فەرمانگە حوكمییەكان دەوام راگیراوە.

مانگ له‌ دواى مانگ دابه‌شكردنى مووچه‌ى فه‌رمانبه‌ران له‌لایه‌ن حكومه‌تى هه‌رێمى كوردستانه‌وه‌ زیاتر دواده‌كه‌وێت و ژماره‌ى مووچه‌ نه‌دراوه‌كان زیاتر ده‌بێت، له‌ كاتێكدا 29 رۆژ پێش ئێستا "نێچیرڤان بارزانى" سه‌رۆكى حكومه‌تى هه‌رێم رایگه‌یاند، دابه‌شكردنى مووچه‌ى فه‌رمانبه‌ران به‌رده‌وام ده‌بێت و مووچه‌ى ئه‌م مانگه‌ و مانگی داهاتووش ئاماده‌یه‌ و دابه‌شده‌كرێت، به‌ڵام تائێستا حكومه‌ت ده‌ستى به‌ دابه‌شكردنى مووچه‌ى مانگى نۆى ساڵى 2017 نه‌كردووه‌.

رێكه‌وتى 13 ى 11 ى 2017، پاش كۆتاییهاتنى كۆبوونه‌وه‌ى ئه‌نجومه‌نى وه‌زیرانى هه‌رێمى كوردستان له‌ شارى هه‌ولێر، له‌ كۆنگره‌یه‌كى رۆژنامه‌وانیدا "نێچیرڤان بارزانى" سه‌رۆكى حكومه‌تى هه‌رێم رایگه‌یاند، دابه‌شكردنى مووچه‌ى فه‌رمانبه‌ران به‌رده‌وام ده‌بێت و مووچه‌ى ئه‌م مانگه‌ و مانگی داهاتووش ئاماده‌یه‌ و دابه‌شده‌كرێت.

ئه‌مڕۆ رێكه‌وتى 12 ى 12 ى 2017، 29 رۆژ تێپه‌ڕده‌بێت به‌سه‌ر ئه‌و قسه‌یه‌ى "نێچیرڤان بارزانى"دا، به‌ڵام حكومه‌تى هه‌رێم هێشتا ده‌ستى نه‌كردووه‌ به‌ دابه‌شكردنى مووچه‌ى مانگى نۆى ساڵى 2017 ى فه‌رمانبه‌ران، هه‌روه‌ها تائێستاش حكومه‌ت مووچه‌ى مانگى سێى ساڵى 2017 ى خانه‌نشینانى مه‌ده‌نى و سه‌ربازى دابه‌شنه‌كردووه‌، به‌وپێیه‌ له‌م مانگه‌دا ژماره‌ى مووچه‌ نه‌دراوه‌كانى خانه‌نشینان ده‌بێته‌ ده‌ مانگ.

بۆ وه‌رگرتنى زانیارى له‌باره‌ى هۆكارى دواكه‌وتنى دابه‌شكردنى مووچه‌، له‌ كاتێكدا "نێچیرڤان بارزانى" ئاماژه‌ى به‌وه‌كردبوو "مووچه‌ى دوو مانگ ئاماده‌یه‌"،  
هه‌ر له‌باره‌ى ئه‌م بابه‌ته‌، "عه‌بدولستار مه‌جید" وه‌زیری كشتوكاڵ و سه‌رچاوه‌كانی ئاو له‌ حكومه‌تى هه‌رێمى كوردستان له‌ چاوپێكه‌وتنێكى ته‌له‌فیزیۆنیدا رایگه‌یاند "حكومه‌تی هه‌رێم ناتوانێت به‌و داهاته‌ی ئێستا هه‌یه‌تی هیچ مانگێك به‌ سیستمی پاشه‌كه‌وتیش مووچه‌ی سه‌رجه‌م فه‌رمانبه‌ران بدات".

ناوبراو ئاماژه‌ى به‌وه‌شكرد "له‌ كۆبوونه‌وه‌كه‌ی دوێنێ دوو شه‌ممه‌ى ئه‌نجومه‌نی وه‌زیراندا بڕیاردراوه‌ لیژنه‌یه‌ك بۆ پێداچوونه‌وه‌ به‌ ژماره‌ی فه‌رمانبه‌راندا پێكبهێنرێت، بۆ ده‌ستنیشانكردنی مووچه‌خۆرانی بندیوار و ئه‌وانه‌ی به‌ نایاسایی خانه‌نشین كراون".

وه‌زیری كشتوكاڵ و سه‌رچاوه‌كانی ئاو له‌ حكومه‌تى هه‌رێمى كوردستان ئه‌وه‌شى خسته‌ڕوو "بڕیاره‌ هه‌فته‌ی داهاتوو كۆمپانیای دیلۆیت وردبینی داهاتی هه‌رێم له‌ ئه‌نجومه‌نی وه‌زیران باس بكات و دواتر بۆ رای گشتی ده‌خرێته‌ڕوو".

له‌ سه‌ره‌تاى ساڵى 2016 ه‌وه‌ حكومه‌تى هه‌رێم سیستمى پاشه‌كه‌وتكردنى مووچه‌ په‌یڕه‌و ده‌كات و مووچه‌ى فه‌رمانبه‌رانى بۆ نیوه‌ و كه‌متر كه‌مكردووه‌ته‌وه‌، به‌ڵام هێشتا مانگانه‌ له‌ كاتى خۆیدا مووچه‌ دابه‌ش ناكات و به‌شێوه‌یه‌ك تا ئه‌مڕۆ رێكه‌وتى 12 ى 12 ى 2017 هێشتا مووچه‌ى مانگه‌كانى 9 و 10 و 11 ى 2017 ى فه‌رمانبه‌رانى دابه‌شنه‌كردووه‌.

جگه‌ له‌ دواكه‌وتنى دابه‌شكردنى مووچه‌ و په‌یڕه‌وكردنى سیستمى پاشه‌كه‌وتكردن له‌لایه‌ن حكومه‌تى هه‌رێمه‌وه‌، هه‌روه‌ها حكومه‌ت مووچه‌ى چوار مانگى ساڵى 2015 ى فه‌رمانبه‌ران قه‌رزداره‌.

چوار ساڵه‌ مووچه‌ى مانگانه‌ى فه‌رمانبه‌رانى هه‌رێمى كوردستان له‌لایه‌ن حكومه‌تى هه‌رێمه‌وه‌ له‌كاتى خۆیدا دابه‌ش ناكرێت و دواده‌كه‌وێت، ئه‌مه‌ش پاش ئه‌وه‌ى به‌هۆى شێوازى هه‌نارده‌كردنى نه‌وتى هه‌رێم كێشه‌ كه‌وته‌ نێوان هه‌ولێر و به‌غدا و به‌وهۆیه‌وه‌ حكومه‌تى عێراق بودجه‌ى هه‌رێمى كوردستانى بڕى و تائێستاش كێشه‌كانی نێوانیان به‌رده‌وامه‌.

ئارێز عەبدوڵڵا سەرۆكی‌ فراكسیۆنی‌ یەكێتی‌ لەئەنجوومەنی‌ نوێنەرانی‌ عێراق ئاماژە بەوە دەكات، كە حەیدەر عەبادی‌ ئامادە نییە "بەهیچ شێوەیەك بودجەو موچەی‌ فەرمانبەران‌و خانەنشینانی‌ كوردستان بنێرێت"، بەرپرسی‌ پەیوەندییەكانی‌ دەرەوەی‌ پارتی‌ دیموكراتی‌ كوردستانیش دەڵێت “عەبادی‌ دەیەوێت كاتەكە بكوژێت تا كاتی‌ هەڵبژاردنەكانی‌ عێراق نەیەتە پای گفتوگۆ لەگەڵ هەرێمی كوردستان".

هەفتەنامەی ئاوێنە ئەمڕۆ سێ‌ شەممە لەزاری، هۆشیار سیوەیلی، بەرپرسی پەیوەندییەكانی دەرەوەی پارتی‌ دیموكراتی‌ كوردستان بڵاویكردووەتەوە، كە "حەیدەر عەبادی‌ بەهۆی كۆنتڕۆڵكردنەوەی ناوچە جێناكۆكەكانەوە توشی جۆرێك لە “غروری سیاسی” بووە لەبەرانبەر هەرێمدا".

هۆشیار سیوەلی راشیگەیاند "هەڵبژاردنی پەرلەمانی عێراق بەڕێوەیە، كە لەئایاری‌ ساڵی‌ داهاتوودا ئەنجامدەدرێت‌‌و لایەنە سیاسییە عێراقییەكان لەنێویشیاندا عەبادی كار بۆ ئەوە دەكەن لەسەر حسابی هەرێمی كوردستان دەنگەكانیان زیاتر بكەن".


بەقسەی ناوبراو "ئەگەر هۆكاری ئەم عینادییەی عەبادی بریتی بێت لەوەی، كە حساباتی هەڵبژاردنەكانی داهاتووی عێراق دەكات، رەنگە بیەوێت كاتەكە بكوژێت تا هەڵبژاردنەكان نەیەتە پای گفتوگۆ لەگەڵ هەرێمی كوردستان".

هاوكات سەرۆكی‌ فراكسیۆنی‌ یەكێتی‌ نیشتمانی‌ كوردستان لەئەنجومەنی‌ نوێنەرانی‌ عێراق، رایگەیاند "عەبادی‌ بەهۆی‌ ئەو پشتیوانییە هەرێمی‌‌و نێودەوڵەتییەوە لەدژی‌ ریفراندۆم بەدەستی‌ هێنا بەتایبەتی پشتیوانی ئەمەریكا، بەهۆی‌ دۆخی‌ ئابووری‌ سەختی‌ كوردستان‌و هەلومەرجی‌ پڕ لەململانێی‌ سیاسی‌ ناوخۆی‌ هەرێمەوە كار لەسەر چۆكپێدانی‌ كوردستان دەكات".

ئارێز عەبدوڵڵا راشیگەیاند "سەڕەرای‌ هەوڵەكانی‌ ناوخۆو گوشاری‌ دەرەكیش بۆ ئەنجامدانی‌ گفتوگۆ، بەڵام هێشتا عەبادی‌ ئامادە نییە دانوستان لەگەڵ‌ حكومەتی‌ هەرێمی‌ كوردستان بكات".

هەروەها وتیشی‌: “عەبادی‌ بەهیچ شێوەیەك ئامادەش نییە موچە‌و بودجە بۆ كوردستان بنێرێت".

ئەمە لەكاتێكدایە، كە عەبادی‌ پێشتر رایگەیاند بوو “بەشێك لەكوردەكان خۆیان داوایان لێكردووە بودجەو موچەو پارە بۆ هەرێمی‌ كوردستان نەنێرێت".

نزیكه‌ی دوو مانگه‌ هێزی پێشمه‌رگه‌ موچه‌یان وه‌رنه‌گرتوه‌ و دیاریش نییه‌ كه‌ی واده‌ی پێدانی موچه‌كانیان راده‌گه‌یه‌نرێت، سه‌رۆكی فراكسیۆنی یه‌كێتیش هۆكاری دواكه‌وتنی دابه‌شكردنی موچه‌ی پێشمه‌رگه‌ ئاشكراده‌كات و راشیده‌گه‌یه‌نێت: ئه‌مریكا مه‌رجێكی نوێی به‌ مه‌به‌ستی هاوكاریكردنی پێشمه‌رگه‌ ئاڕاسته‌ی هه‌رێم كردووه‌.

 

 

دلێر ماوه‌تی سه‌رۆكی فراكسیۆنی یه‌كێتی له‌ په‌رله‌مانی كوردستان، به‌ هەواڵى سلێمانی راگه‌یاند: له‌مانگی رابردووه‌وه‌ هاوكارییه‌ ماددیه‌كانی ئه‌مریكا بۆ لیوا هاوبه‌شه‌كانی وه‌زاره‌تی پێشمه‌رگه‌ وه‌ستاوه‌ كه‌ ژماره‌یان 36هه‌زار پێشمه‌رگه‌ بوو، بۆیه‌ ئێستا حكومه‌تی هه‌رێم ناچاره‌ موچه‌ی ئه‌و هێزانه‌ش دابین بكات.

وتیشی"یه‌كێك له‌هۆكاره‌كانی دواكه‌وتنی موچه‌، ده‌گه‌ڕێته‌وه‌ بۆ كۆتاییهاتنی هاوكاریه‌كانی ئه‌مریكا بۆ ئه‌و 36 هه‌زار پێشمه‌رگه‌یه‌".

ماوه‌تی راشیگه‌یاند: وه‌زاره‌تی پێشمه‌رگه‌ رایگه‌یاندوه‌ كه‌ ئه‌مریكا به‌ڵێنیداوه‌ هاوكارییه‌ ماددیه‌كانی بۆ لیوا هاوبه‌شه‌كانی پێشمه‌رگه‌ به‌رده‌وام بێت كه‌ بڕه‌كه‌ی 365 ملیۆن دۆلاره‌، به‌ڵام پێده‌چێت بكه‌وێته‌ ساڵی داهاتووه‌وه‌.

به‌وته‌ی سه‌رۆكی فراكسیۆنی یه‌كێتی كه‌ هاوكات جێگری سه‌رۆكی لیژنه‌ی پێشمه‌رگه‌یه‌، له‌دوای رووداوه‌كانی 16ی تشرینی یه‌كه‌مه‌وه‌، لیوا هابه‌شه‌كانی پێشمه‌رگه‌ جیابوونه‌ته‌وه‌، بۆیه‌ ئه‌مریكا به‌ڕاشكاوی مه‌رجی ئه‌وه‌ی بۆ هه‌رێم داناوه‌ كه‌ ئه‌گه‌ر ئه‌و 14 لیوا هاوبه‌شه‌ كه‌ ئێستا 10 لیوایان جیابوونه‌ته‌وه‌ یه‌كنه‌گرنه‌وه‌، ئه‌وه‌ ئاماده‌ نییه‌ هاوكارییان بكات، بۆیه‌ ئێستا هه‌وڵی یه‌كگرتنه‌وه‌یان ده‌درێت.

پۆلیسى هه‌ولێر زانیارى له‌باره‌ى گیانله‌ده‌ستدانى گه‌نجه‌ ته‌مه‌ن 21 ساڵه‌كه‌ى شاره‌كه‌وه‌ ئاشكرا كرد و ئاماژه‌ى به‌وه‌كرد "گه‌نجه‌كه‌ خۆى كۆتایى به‌ ژیانى خۆى هێناوه‌ و به‌ گوللـه‌یه‌ك خۆى كوشتووه‌".

ئه‌مڕۆ دوو شه‌ممه‌ رێكه‌وتى 11 ى 12 ى 2017، ، پۆلیسى هه‌ولێر ئاماژه‌ى به‌وه‌كردووه‌ "شه‌وی ڕابردوو كاتژمێر 11 پۆلیس ئاگاداركرانه‌وه‌ به‌بوونی ڕووداوێكی خۆكوشتن له‌ گه‌ڕه‌كی هاوكاری شاری هه‌ولێر".

ئه‌وه‌شى خستووه‌ته‌ڕوو "دوای گه‌یشتنی پۆلیس بۆ شوێنی ڕووداو، ده‌ركه‌وت كه‌وا گه‌نجێك به‌ناوی (م، خ، ب) ته‌مه‌ن 21 ساڵ، له‌ ماڵه‌كه‌ی خۆیان به‌ گوللـه‌یه‌ك كۆتایی به‌ژیانی خۆی ده‌هێنێت".

پۆلیسى هه‌ولێر راشیگه‌یاندووه‌ "دۆسیه‌ی لێكۆڵینه‌وه‌ بۆ ئه‌م ڕووداوه‌ كرایه‌وه‌، به‌ڕێز دادوه‌ر بڕیاریدا به‌ وه‌رگرتنی وته‌ی داواكاری مافی كه‌سی".

موقتەدا سەدر رابەری رەوتی سەدر لە عێراق داوا دەکات رێگا بە حەشدی شەعبی نەدرێت بەشداری لە هەڵبژاردنەکاندا بکرێت و ئاماژە بەوەشدەکات کە پشتگیری لە عەبادی دەکات.

ئەمڕۆ دوو شەممە موقتەدا سەدر رابەری رەوتی سەدر رایگەیاند '' داوا لە حکومەت دەکەم کە بەهیچ شێوەیەک رێگا نەدات حەشدی شەعبی بەشداری لە هەڵبژاردنەکان بکات هەروەها داوا لە سەرایەی سەلام کە باڵێکی گەورەی ناو حەشدی شەعبییە، چەکەکانیان دابنێن و رادەستی حکومەتی بکەن''.

موقتەدا سەدر لە پەیامەکەیدا هەروەها ئاماژەی بەوەشکرد کە جارێکی تر شکۆمەندی گەڕاوەتەوە بۆ هێزە عێراقییەکان و هێزە ئەمنییەکان.

لەبارەی هەڵمەتەکەی عەبادی بۆ روبەروبونەوەی گەندەڵی، موقتەدا سەدر رایگەیاندووە '' پشتگیری تەواوی ئەو کارە دەکەین و داوا دەکەم لێپرسینەوە لەگەڵ سەرجەم گەندەڵکاران ئەنجامبدرێت''.

هەر لەو پەیامەدا، موقتەدا سەدر بەباشی زانیوە دۆسیەی فەلەستین تێکەڵ بە عێراق نەکرێت و داوایکردووە ئەو باسە لە عێراق دوربخرێتەوە.

لەبەشێکی تردا داوای لە حکومەت کردووە، لێکۆڵینەوەی تەواو لە هۆکارەکانی کەوتنی موسڵ و هێرشی سەر سەربازگەی سپایکەر بکات.

الصفحة 2 من 1160

 

پەیوەندی

بۆ پەیوەندی کردن بە بەرێوەبەرایەتی تۆڕی هەواڵی هەولێر ئەو ئیمێل و ژمارە مۆبایلانەی خوارەوە بەکاربێنە

  • ناونیشنا : عێراق - هەولێر - بەرامبەر نەخۆشخانەی سەنتەری دڵ

  • ئیمێل : عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

  • ماڵپەر :٠٠٩٦٤٧٥٠٤٥٤٧٩٣٧

    ماڵپەر : ٠٠٩٦٤٧٥٠٤٦٦١٧٤٥