بەژداری پێ کردنی هەواڵ لە

FacebookTwitterGoogle BookmarksRSS Feed
پارتی دیموكراتی‌ كوردستان داوا له‌لایه‌نگرانی له‌كه‌ركوك ده‌كات ده‌نگ به‌سێ لیستی جیاوازی شاره‌كه‌ بده‌ن، به‌رپرسێكی یه‌كێتیش ناوی ئه‌و لیستانه‌ ئاشكراده‌كات و ڕایده‌گه‌یه‌نێت، "به‌شێك له‌لایه‌نگرانی پارتی له‌سنوره‌كه‌ له‌حزبه‌كه‌یان نیگه‌رانن و بڕیاریانداوه‌ ده‌نگ به‌لیستی 162ی یه‌كێتیی بده‌ن".

 

 

غازی كه‌ركوكی جێگری لێپرسراوی مه‌ڵبه‌ندی كه‌ركوكی یه‌كێتیی له‌كه‌ركوك به‌تۆڕى هەواڵى سلێمانی ڕاگه‌یاندووە، "به‌گوێره‌ی‌ زانیارییه‌كانمان كه‌ به‌ڵگه‌ی له‌گه‌ڵدایه‌، پارتی داوای له‌لایه‌نگرانی كردوه‌ له‌سنوری كه‌ركوك، به‌شێكیان ده‌نگبده‌ن به‌لیستی سۆسیالیست و به‌شێكیشیان به‌یه‌كگرتوی ئیسلامی و به‌شێكی دیكه‌شیان به‌لیستی هاوپه‌یمانی".

وتیشی:"به‌بڕیاری حزبی ئه‌و داواكارییه‌ له‌لایه‌نگرانی پارتی له‌كه‌ركوك كراوه‌ كه‌ ده‌نگ به‌و سێ لیسته‌ بده‌ن".

به‌وته‌ی به‌رپرسه‌كه‌ی‌ یه‌كێتیی له‌كه‌ركوك، به‌شێك له‌لایه‌نگرانی پارتی له‌سنوره‌كه‌، ئێستا له‌پارتی زۆر نیگه‌رانن و پێیانوایه‌ له‌سه‌خترین دۆخدا به‌جێیهێشتون و بایكۆتی هه‌ڵبژاردنی پارێزگاكه‌ی كردوه‌، بۆیه‌ بڕیاریانداوه‌ ده‌نگ به‌لیستی 162ی یه‌كێتیی نیشتمانیی كوردستان بده‌ن".

ئه‌وه‌شی ڕونكرده‌وه‌، "ئه‌و لایه‌نگرانه‌ی پارتی كه‌ ده‌نگ به‌لیستی 162ی یه‌كێتیی ده‌ده‌ن، به‌بڕیاری پارتی نییه‌، به‌ڵكو له‌ئه‌نجامی ئه‌و نیگه‌رانیه‌یه‌ كه‌ له‌حزبه‌كه‌یان هه‌یانه‌".

له‌سه‌ر بڕیاری‌ حكومه‌ت دادگا مافی‌ په‌رله‌مانتاری‌ له‌دوو په‌رله‌مانتار سه‌نده‌وه‌و به‌رپرسێكی‌ باڵای‌ پارتی‌ دیموكراتی‌ گه‌لان (هه‌ده‌په‌)ش ئاشكرایده‌كات، بڕیاروایه‌ ئه‌م پێنجشه‌ممه‌یه‌ 15 په‌رله‌مانتاری‌ دیكه‌ش مافی‌ په‌رله‌مانتاریان لێ‌ بسه‌ندرێته‌وه‌، ده‌شڵێت:"تائێستا 11ی‌ دیكه‌ش مافی‌ په‌رله‌مانتاریان لێ‌ سه‌ندراوه‌ته‌وه‌".

 

 

ئێواره‌ی‌ دوێنێ‌ مێدیای‌ تورك ئاشكرایكرد، له‌سه‌ر داواو ڕاسپارده‌ی‌ پارتی‌ دادو گه‌شه‌پێدان (ئاكپارتی‌ ـ پارتی‌ ده‌سه‌ڵاتداری‌ توركیا) دادگای‌ ئه‌و وڵاته‌ مافی‌ په‌رله‌مانتاریی‌ له‌هه‌ریه‌ك له‌(عوسمان بایده‌میرو سه‌لما ئیرمه‌ك) په‌رله‌مانتارانی‌ هه‌ده‌په‌ سه‌نده‌وه‌.

عابد ئیكه‌ نوێنه‌ری هه‌ده‌په‌ له‌هه‌رێمی‌ كوردستان راگەیاندووە:"له‌كۆبونه‌وه‌ی ئه‌نجومه‌نی گشتیی په‌رله‌مانی توركیا، مافی‌ په‌رله‌مانتارێتی له‌عوسمان بایده‌میرو سه‌لما ئیرمه‌ك سه‌ندرایه‌وه‌، ئێمه‌ش پێمانوایه‌ ئه‌مه‌ شه‌ڕه‌ گه‌وره‌كه‌یه‌ له‌گه‌ڵ كورد ده‌ستی‌ پێكردوه‌".

ئاشكراشیكرد، پێشتر به‌هه‌مانشێوه‌ له‌دژی‌ هه‌ده‌په‌ حكومه‌تی‌ توركیا دادگای‌ وڵاته‌كه‌ی‌ ناچاركرد كه‌ مافی‌ په‌رله‌مانتاری‌ له‌ 11 په‌رله‌مانتاری‌ دیكه‌ی‌ هه‌ده‌په‌ وه‌ربگرێته‌وه‌.

به‌وته‌ی‌ ئیكه‌، "ئێستا هه‌ده‌په‌ نۆ په‌رله‌مانتاری‌ له‌زیندانن و ڕۆژی‌ پێنجشه‌ممه‌ی‌ داهاتوش بڕیاروایه‌ 15 په‌رله‌مانتاری‌ دیكه‌ مافی‌ په‌رله‌مانتاریان لێبسه‌نرێته‌وه‌".

ئه‌و به‌رپرسه‌ی‌ هه‌ده‌په‌ له‌باشوری‌ كوردستان جه‌ختیكرده‌وه‌، "هه‌موو ئه‌و هه‌وڵانه‌ی‌ توركیا به‌ئامانجی‌ لاوازكردنی‌ ده‌نگی‌ كوردو هه‌ده‌په‌یه‌، به‌ڵام ئێمه‌ دڵنیاین له‌وه‌ی‌ ڕێژه‌ی‌ ده‌نگ و كورسیه‌كانمان زۆر زیاد ده‌كات له‌و هه‌ڵبژاردنه‌ پێشوه‌خته‌یه‌ی‌ بڕیاره‌ له‌توركیا به‌ڕێوه‌بچێت".

ئه‌وه‌شی‌ وت:"له‌ڕۆژی‌ 7ی‌ حوزه‌یرانی‌ 2015وه‌ تائێستا به‌به‌رده‌وامی‌ فشارێكی‌ ئێجگار زۆر له‌سه‌ر هه‌ده‌په‌و گه‌لی‌ كورد دروستبوه‌ له‌لایه‌ن ئاكپارتی‌ و حكومه‌تی‌ توركیاوه‌، به‌ڵام ئێمه‌ پێمانوایه‌ له‌هه‌ڵبژاردنی‌ پێشوه‌خته‌دا هه‌موو ئه‌و ده‌نگانه‌ی‌ كه‌ كوردن و به‌ئاكپارتی‌ یان لایه‌نێكی‌ دیكه‌ دراون، بۆ هه‌ده‌په‌ ده‌گه‌ڕێنه‌وه‌".

هۆكاره‌كه‌شی‌ بۆ ئه‌وه‌ گه‌ڕانده‌وه‌، "ئه‌ردۆغان و پارته‌كه‌یی و لایه‌نگره‌كانی‌ زوڵمێكی‌ زۆر گه‌وره‌یان له‌باشورو ڕۆژئاواو باكوری‌ كوردستانیش كردوه‌".

ئەمڕۆ 22ی نیسانی 2018 پۆلیسی ئەمریکا رایگەیاند کە بەهۆی تەقەکردنەوە سێ کەس کوژراون.

کەناڵی سکای نیوز بڵاویکردەوە کە بەهۆی تەقەکردنەوە لە شاری ناشڤێل لە ویلایەتی تێنیسی بەهۆی تەقەکردنەوە سێ کەس کوژراون و چواری دیکەش بریندارن.

ئاماژەی بەوەشداوە کە تەقەکردنەکە لە چێشتخانەیەک لە باشوری خۆرهەڵاتی ناشڤێل روویداوە و پۆلیسیش هۆکاری تەقەکردنەکەی ئاشکرانەکردوە.

 

قوباد تاڵەبانی جێگری سەرۆكی حكومەتی هەرێمی كوردستان رایگەیاند، كوردستان لە ژێر مەترسیدایەو ھاوسەنگی ھێزیش لەعێراق تێكچووە، بۆیە "شۆڕشێكی سیاسی رادەگەیەنین".

ئەو قسانەی قوباد تاڵەبانی لەمیانی وتارێك بووە، كە ئەمڕۆ یەك شەممە لەبانگەشەی هەڵبژاردنی عێراق بۆ لیستی یەكێتی نیشتمانی كردوویەتی‌و راشیگەیاندووە "تەنیا بە پشتیوانی و دەنگی ئێوەی خەڵكی تێكۆشەر، دەتوانین تیمێكی نوێ بنێرینە بەغدا تا شەڕ لە سەر مافەكانمان بكەن".

جێگری سەرۆكی حكومەت ئەوەشی راگەیاندووە، كە كوردستان لە ژێر مەترسیدایە، "راستە بەھەوڵی پێشمەرگە تێكۆشەرەكان توانرا مەترسی داعش لە سەر كوردستان لاببرێت، بەڵام كێشەكان تەنھا كێشەی ئەمنی نین و لە ئێستادا ھاوسەنگی ھێز لە عێراق تێكچووە".

قوباد تاڵەبانی هەروەها رایگەیاند "لەساڵانی رابردوو بەھۆی سەنگ و قورسایی جەنابی مام جەلال ھاوسەنگی كوردستان و عێراق پارێزراو بوو. ئەمەش ببوە ھۆی ئەوەی كە ئارامی و سەقامگیری بگاتە كوردستان".

هاوكات رایگەیاندووە "یەكێتی شەڕی كردووە لە پێناو ئاشتی و خۆشگوزارانیدا، نەك شەڕ بكات تەنھا لە پێناو شەڕدا، كە  لەبەغدا دەتوانێت شەڕی جێ بەجێكردنی دەستوور موچە بكات، بەڵام ئەم شەڕە بە پشتیوانی و دەنگی خەڵكی ئەم دەڤەرە دەكرێت".

لایەنە شیعییەكان كار بۆ دروستكردنی هاوپەیمانییەكی گەورە لەعێراق دەكەن، بۆ ئەوەی لەدوای هەڵبژاردن حكومەتی زۆرینە پێكبهێنن.

بەپێی رۆژنامەی حەیات، لایەنە شیعییەكان ماوەیەكە دەستیان بەهەوڵێك كردووە، بۆ ئەوەی هاوپەیمانییەی شێوەی هاوپەیمانی نیشتمانی پێكبهێنن، كە لەساڵانی رابردوو پێكیانهێناوە.

هەر بەپێی رۆژنامەكە هاوپەیمانییەكە لەژێر ناوی هاوپەیمانی نیشتمانی شیعەكان، یان ناوێكی تر دروستدەكرێت، كە لەزۆرینەی لایەنە شیعییەكان پێكدێت.

رۆژنامەكە باسی لەوەش كردووە، ئامانج لەپێكهێنانی ئەو هاوپەیمانییە، بۆ دروستكردنی زۆرینەیەكی پەرلەمانییە لەعێراق، بۆ ئەوەی دوای هەڵبژاردنی 12ی ئایار حكومەتی زۆرینە پێكبهێنن.

بڕیارە لە 12ی ئایاری داهاتوو هەڵبژاردنی ئەنجوومەنی نوێنەرانی عێراق بەرێوەبچێت، كە لایەنە شیعییەكان، ئێستا بەچەند پێكهاتەیەكی جیاواز بەشداری ئەو هەڵبژاردنە دەكەن.

رۆژنامەكە ئەوەشی ئاشكراكردووە، كە لایەنە شیعییەكان دەیانەوێت پێش ئەنجامدانی هەڵبژاردن ئەو پرسە یەكلابكەنەوەو لەسەر پۆستە سیادییەكان رێككەوتن بكەن.

بانكی رافیدەینی عێراقی رایگەیاند، كە قەرز دەداتە ئەو كەسانەی دەیانەوێت ئۆتۆمبیلی نوێ‌ بكڕن.

بانكی رافیدەین، ئەمڕۆ یەك شەممە راشیگەیاند، كە قەرزەكە لەرێگەی پرۆژەیەكی تایبەت بەو بوارە دەبێت، لەماوەی داهاتوو لەتەواوی لقەكانی دەیخاتە بواری جێبەجێكردن.

بانكەكە بەرێككەوتن لەگەڵ چەند كۆمپانیایەكی كڕین‌و فرۆشتنی ئۆتۆمبیل پرۆژەكە جێبەجێدەكات، كە كۆمپانیاكان بریتین لە "(ابداع البعاج ، عتا‌و الرحمن ، الشركە المتحدە لتجارە السیارات ، سما الغربیە ، وهج السریا ، نهج العراق ، شیرین ، انوار بابل ، ساز ، تریق الاقواس ، الشركە العامە لتجارە السیارات والمعدات ، الشركە العامە لتجارە السیارات والمكائن)".

هەروەها ئەو بانكە رایگەیاندووە، ئەو كۆمپانیایانە تایبەتن بەئۆتۆمبیلی وڵاتانی كۆریاو چین‌و ژاپۆن‌و ئەمریكاو قەرزەكەش بۆ ماوەی پێنج ساڵ دەبێت، بەبێ‌ ئەوەی بڕەكەی دیاریبكات.

یاسین عیزەدین جێگری لێپرسراوی مەڵبەندی كەركوكی یەكێتیی نیشتمانیی كوردستان رایدەگەیەنێت دوای ئەوەی پارتی پێگەی خۆی لە كەركوك لەدەست دا، ئێستا كار لەسەر لاوازكردنی پێگەی كورد دەكات لە شارەكەدا.

یاسین عیزەدین لە لێدوانێكیدا بۆ تۆڕیهەواڵی سلێمانی رایگەیاند پێچەوانەی ئەوەی میدیاو بەرپرسانی پارتی باسی دەكەن، هیچ نەتەوەیەك لە كەركوك بەكوردیشەوە هۆشداری ئەوەی نەداوە كەبایكۆتی هەڵبژاردنەكان لەكەركوك دەكات.

وتیشی"ماوەی چەند رۆژێكە بانگەشەی هەڵبژاردن لەشارەكە زۆر بەئاسایی بەڕێوەدەچێت و كوردیش بەجۆش و خرۆشەوە بەشداری دەكات و هیچ كێشەیەك لەئارادا نییە".

راشیگەیاند: پارتی پێگەی خۆی لە كەركوك لەدەستداوەو ئێستا بەبڵاوكردنەوەی زانیاری ناڕاستیش، هێندەی تر پێگەی خۆیان لەدەست دەدەن، هەوڵیش دەدەن بەو رێگەیە پێگەی كورد و یەكێتی لەشارەكە لاواز بكەن، بەڵام پێیان ناكرێت.

ئەو لێپرسراوەی یەكێتی ئەوەشیخستەڕوو كە ئەگەر پارتی مەبەستی بایكۆتكردنی پڕۆسەی هەڵبژاردنی پەرلەمانی عێراق بوایە، دەبوو لەپارێزگای موسڵ و ناوچەكانی دیكەش بەشداری نەدەكرد، نەك تەنها لە كەركوك كە تا 10 ساڵی تریش ناتوانن پێگەی جەماوەری خۆیان بەدەستبهێننەوە.

یاسین عزەدین باس لەوەشدەكات هەرچەندە بەشێك لەهاووڵاتیان نیگەران و ناڕازین لەو كێشانەی كە لە دەرئەنجامی ریفراندۆم لەسنوورەكە دروستبووە، "بەڵام یەكێتی هەموو كەركوكییەكان دڵنیادەكاتەوە كە ئەم قۆناغە تێدەپەڕێنرێت و هەموو دەسەڵاتەكان وەردەگیرێتەوە".

وەزارەتی دارایی هەرێم بڕی ملیارێك دیناری دیكە بۆ دەستكاریكردنی موچەی وەزارەتی ناوخۆ زیاد دەكات و سەرۆكی لیژنەی ناوخۆ لەپەرلەمانی كوردستانیش، وردەكاریی موچەی ئەو وەزارەتەو هێزەكانی یەكەی پاسەوانی ئاشكرا دەكات و رایدەگەیەنێت: "ئەم هەفتەیە موچەی وەزارەتی ناوخۆ بە سیستمی نوێ دابەشدەكرێت".

 

 

ئەیوب عەبدوڵڵا، سەرۆكی لیژنەی ناوخۆ و ئاسایش و ئەنجومەنە خۆجێیەكان لە پەرلەمانی كوردستان،  راگەیاندوە: نوێترین زانیاری لەبارەی سیستمی نوێی موچەی وەزارەتی ناوخۆ و یەكەی پاسەوانی ئەوەیە كە وەزارەتی دارایی بڕی ملیارێك دیناری دیكەی بۆ ئەو وەزارەتەكە زیاد كردووە، بەو پێیە ئێستا بڕی 11 ملیار دینار بۆ دەستكاریكردنی موچەی كارمەندانی ئەو وەزارەتە تەرخانكراوە.
 
وتیشی:" ئەو لیژنە هاوبەشەی كە لەنێوان هەردوو وەزارەتی ناوخۆ و دارایی پێكهێنراوە، گەیشتوونەتە ئەوەی كە ئەو بڕە پارەیەی بۆ وەزارەتی ناوخۆ تەرخانكراوە بە هێزەكانی یەكەی پاسەوانیشەوە، بەشی دەستكاریكردن و كەمكردنەوەی رێژەی لێبڕینەكان چەند دەكات بەو شێوەیە سیستمێك ئامادە بكەن".
 
راشیگەیاند: بەپێی زانیارییەكانمان، وەزارەتی دارایی هەرێم چاوەڕوانی لیستی موچەی وەزارەتی ناوخۆیە بەو سیستمە نوێیەی كە بڕیارە ئامادە بكرێت، بۆ ئەوەی لەم هەفتەیەدا موچەیان بەپێی سیستمی نوێ بدرێتێ بە یەكەی پاسەوانیشەوە.
 
بەوتەی سەرۆكی ئەو لیژنەیە، ئەو سیستمەی وەزارەتی ناوخۆ جیاواز دەبێت لە سیستمی موچەی وەزارەتە مەدەنیەكان، كە لە (10%)ەوە دەستپێدەكات بۆ (30%).

دوانیوەڕۆی ئەمڕۆ 21-4-2018 هێزێكی پێشمەرگە لە بازگەی قەرەهەنجیر جێگیر بوو.

لەو بارەیەوە سەرچاوەیەكی ئەمنی لە ناو كەركوك بە ماڵپەری فەرمی یەكێتیی راگەیاندووە،  هێزێكی پێشمەرگە لە بازگەی قەرەهەنجیر جێگیر بوو، دوای ئەوەی پۆلیسی ناوخۆی عیراق كە پێشتر لەو بازگەیە بوون كشانەوە.

ئەو سەرچاوەیە ئاماژەی بەوەشكردووە، هۆكاری جێگیر بوو ئەو هێزەی پێشمەرگە بۆ ئەو رێوشێوینە سەربازییانە دەگەڕێتەوە كە لە ناوچەكەدا گیراونەتەبەر.

حاكم قادر حەمەجان ئەندامی مەكتەبی سیاسی یەكێتی نیشتمانی داوای كرد لایەنەكانی هەرێمی كوردستان توندی هەڵمەتی هەڵبژاردنی عێراق رابگرن.

حاكم قادر ئەمڕۆ شەممە لەمیانی لێدوانێكی رایگەیاند، ئێمە داوا لەلایەنەكان دەكەین، ئەو هەڵمەتە توندەی بۆ هەڵبژاردن دەست پێكراوە رابگرن.

ئەندامەكەی مەكتەبی سیاسی یەكێتی راشیگەیاند، كە دەبێت هەڵمەت‌و پرۆسەی هەڵبژاردنیش دووربن لەتوندوتیژی، بۆیە دەبێت ئەو هەڵمەتە توندە رابیگرێت.

چەند رۆژێكە هەڵمەتی هەڵبژاردنی پەرلەمانی عێراق دەستیپێكردووە، كە پرۆسەكە لە 12ی ئایاری داهاتوو بەرێوەدەچێت، بۆ ئەوەش لایەنەكان هەڵمەتێكی توند بەرێوەدەبەن.

ئەندامەكەی مەكتەبی سیاسی یەكێتی داواشی كرد، كە نابێت پەیوەندی لایەنەكان بەهۆی هەڵبژاردنەكانەوە تێكبچێت.

الصفحة 1 من 1239

 

پەیوەندی

بۆ پەیوەندی کردن بە بەرێوەبەرایەتی تۆڕی هەواڵی هەولێر ئەو ئیمێل و ژمارە مۆبایلانەی خوارەوە بەکاربێنە

  • ناونیشنا : عێراق - هەولێر - بەرامبەر نەخۆشخانەی سەنتەری دڵ

  • ئیمێل : عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

  • ماڵپەر :٠٠٩٦٤٧٥٠٤٥٤٧٩٣٧

    ماڵپەر : ٠٠٩٦٤٧٥٠٤٦٦١٧٤٥